کەشناسی: سبەی بارانبارین بەردەوام دەبێت

 

 

کەشناسیی هەرێمی کوردستان رایگەیاند، دوای نیوەڕۆی ئەمڕۆ لە سەنتەری پارێزگاکان تاوەبارانی کەم دەبارێت و لە قەڵادزێ، دووکان، رانیە، کۆیە و باکووری رۆژهەڵاتی سەنتەری پارێزگای هەولێر بارانی زیاتر دەبارێت؛ لە ئێوارەدا بارانبارین کەم دەبێتەوە.

 

بەراورد بە دوێنێ، ئەمڕۆ "چەند پلەیەک" گەرما دادەبەزێت. لەبارەی کەشوهەوای سبەینێوە کەشناسی دەڵێت، لە ناوچە سنوورییەکان و بەشێک لە لووتکەی چیاکان بەفر دەبارێت. لەبارەی بارانبارینیشەوە رایگەیاندووە، "لە ناوچە جیاکانی پارێزگاکانی هەولێر، دهۆک و کەرکووک نمەبارانی کەم دەبارێت؛ لە سنووری پارێزگاکانی سلێمانی و هەڵەبجە بارانی زیاتر دەبارێت".

 

ئاراس جەبار، شارەزای کەشناسی ئەمڕۆ چوارشەممە بە تۆڕی میدیایی رووداوی گوت، "سبەی ئەگەری باران لە شارەکانی هەولێر و دهۆک زۆر لاوازە و ئاسمان ساماڵ و پەڵەهەور دەبێت، لە سلێمانی، گەرمیان و ناوچەکانی دیکە هەندێک جار نمەباران دەبارێت و بەگشتی شەپۆلەکە لە ئێوارەدا کۆتایی دێت".

 

ئاراس جەبار گوتی، 27ـی مانگ شەپۆلێکی دیکەی بەفر و باران هەرێمی کوردستان دەگرێتەوە و بەفربارین لە زۆرینەی ناوچە شاخاوییەکان دەبارێت، لەوانە سەنتەری قەزاکانی پێنجوێن و مێرگەسۆر".

 

 

هەولێر؛ 14 پلەی سیلیزی

سلێمانی؛ 14 پلەی سیلیزی

دهۆک؛ 13 پلەی سیلیزی

کەرکووک؛ 16 پلەی سیلیزی

هەڵەبجە؛ 15 پلەی سیلیزی

 زاخۆ؛ 13 پلەی سیلیزی

گەرمیان؛ 18 پلەی سیلیزی

حاجی ئۆمەران؛ 2 پلەی سیلیزی

سۆران؛ 10 پلەی سیلیزی