لە خاڵی سفری سنوورەوە؛ حەشدی شەعبی و سوپای عێراق خراونەتە ئامادەییەوە

 

قاسم موسڵیح، فەرماندەی ئۆپەراسیۆنەکانی حەشدی شەعبی لە پارێزگای ئەنبار، لە وەڵامی پرسیارێکی پەیامنێری رووداو سەبارەت بە هەبوونی پەیوەندی لەگەڵ هێزەکانی سووریای دیموکرات (هەسەدە) گوتی: "نەخێر، هیچ پەیوەندییەکمان نییە. دیسان دەیڵێمەوە هیچ پەیوەندییەکمان نییە. ئەگەر حکومەتی عێراق هەماهەنگییەکی لەگەڵ وڵاتانی دراوسێ هەبێت، ئەوە پەیوەندی بە حکومەتەوە هەیە، نەک فەرماندەکانی ئێرە."

 

تۆمارکردن و بڵاوبوونەوەی چەند گرتە ڤیدیۆییەک لەلایەن گرووپە چەکدارەکانی سووریای عەرەبی، لە عێراق وەک هەڕەشەیەک بۆ سەر ئاسایشی وڵات دەبینرێت و کاردانەوەی لێکەوتووەتەوە.

 

باوکی حەسەنێن، فەرماندەی لیوای "تەفوف"ی حەشدی شەعبی، ئەو گرتە ڤیدیۆییانە بە "پڕوپاگەندەی لاوازەکان" ناودەبات و دەڵێت: "ئێمە ئێستا لەسەر سنوورین، با بێن جارێکی دیکە چانسی خۆیان تاقیبکەنەوە؛ ئەوکات دەبینن رۆڵە پاڵەوانەکانی عێراق لە هێزە ئەمنییەکان و حەشدی شەعبی چۆن وەڵامیان دەدەنەوە."

 

لای خۆشییەوە، ئەبو سەیف تەمیمی، نوێنەری لیوای 13ـی حەشدی شەعبی، جەخت لە پاراستنی سنوورەکان دەکاتەوە و دەڵێت: "مادام ئێمە لێرەین، ناتوانن بگەنە کەربەلا و بستێکیش بێنە نێو خاکی عێراق."

 

بەدرێژایی نزیکەی 530 کیلۆمەتر لەسەر سنوور، دیواری کۆنکرێتی، تەلی دڕکاوی و کامێرای حەراری جێگیرکراون، بەڵام هێشتا 90 کیلۆمەتر لە سنوورەکە ماوە کە بەو بەربەستانە قایم بکرێت.

 

لە کۆتا خاڵی نێوان عێراق و سووریا، ئاڵای هەردوو وڵات بەرامبەر یەک دەشەکێنەوە. هەرچەندە لێرە دەنگی تەقە نابیسترێت، بەڵام لەنێو شارەکاندا خەڵک هێشتا ترسیان هەیە و دەترسن سیناریۆی ساڵی 2014 دووبارە ببێتەوە، داعش لە سنوورەکان بپەڕێتەوە و جارێکی دیکە بەشێک لە خاکی عێراق داگیر بکات.