شەڕەتەقە لە نێوان دانیشتووانی گوندێکی پشدەر و گەریلاکانی پەکەکەدا روویدا

 

 

بەکر بایز، قایمقامی قەزای پشدەر بە تۆڕی میدیایی رووداوی راگەیاند، "پێشنیوەڕۆی ئەمڕۆ پێنجشەممە 24-6-2021 لەسەر سنووری باشوور و رۆژهەڵاتی کوردستان، شەڕە تەقە لەنێوان دانیشتووانی گوندی شێنێی سەر بە قەزای پشدەر و چەند گەریلایەکی پەکەکەدا روویداوە و بەهۆیەوە دانیشتوویەکی گوندەکە برینداربووە".

 

سەبارەت بە هۆکاری شەڕەکەش، بەکر بایز گوتی: "تاوەکو ئێستا هۆکاری شەڕەکە دیارنییە و ئاسایشی راپەڕینیش دەستی بە لێکۆڵینەوە کردووە".

 

بەڵام هیوا گەیلانی، بەرپرسی لقی 11ی پارتی لە راپەڕین بە رووداوی راگەیاند، شەڕەکە لەسەر وەرگرتنی باج بووە لەلایەن پەکەکەوە لە دانیشتووانی گوندەکە و گوتیشی: "لەشەڕەکەدا دانیشتوویەکی گوندەکە بەناوی  فەقێ حەمەد ئیسماعیل و گەریلایەکیش بریندار بووە".