شاندی هەولێر و بەغدا کۆبوونەوە؛ 'ئەمڕۆش رێککەوتنی کۆتایی نەکرا'

 

 

رۆژی یەکشەممە، 24ـی ئابی 2025، بەرپرسێکی وەزارەتی دارایی بە رووداوی راگەیاند: "لە دوێنێ شەوەوە شاندێکی هەرێمی کوردستان بۆ گفتوگۆکردن لەبارەی داهاتی نانەوتیی هەرێمی کوردستان سەردانی بەغدایان کردووە، ئەمڕۆ لەگەڵ وەزارەتی دارایی و تەیف سامی، وەزیری دارایی کۆبوونەتەوە".

 

بە گوتەی ئەو سەرچاوەیە، سبەی درێژە بە کۆبوونەوەکان دەدرێت و "ئەمڕۆ نەگەیشتنە رێککەوتنی کۆتایی".

 

ناکۆکییەکە لەسەر داهاتی باج و رسووماتە. سەرچاوەکەی رووداو دەڵێت: "عێراق داوای 100٪ـی دەکات، بەڵام هەرێمی کوردستان بە هیچ شێوەیەک بەمە رازی نابێت، بەڵام رێککەوتوون لەسەر 50٪ـی داهاتی گومرک و سنوورەکان."

 

شاندی هەرێمی کوردستان پێکهاتوون لە کۆڤان تەحسین، بەڕێوەبەری گشتیی ژمێریاری لە وەزارەتی دارایی، کەمال تەیب، بەڕێوەبەری گشتیی باج لە هەرێمی کوردستان و چەند بەڕێوەبەرێکی گشتی لە دیوانی چاودێریی دارایی هەرێمی کوردستان.

 

کۆبوونەوەی ئەمڕۆ درێژەپێدەری کۆبوونەوەکانی هەفتەی رابردووە؛ شاندی هەرێمی کوردستان رۆژی 19ـی ئابی 2025، لەگەڵ لێژنە وەزارییەکەی حکومەتی عێراق و رۆژی دواتریش لەگەڵ وەزیری دارایی کۆبوونەوە، بەڵام نەگەیشتنە هیچ رێککەوتنێک.

 

تاوەکو ئێستا مووچەی مانگی 6ـی مووچەخۆرانی هەرێمی کوردستان دابەش نەکراوە. ئەو بەرپرسە دەڵێت: "نووسراوی فەرمیی خەرجکردنی شایستە داراییەکانی مانگی 6 گەیشتووەتە دەستی تەیف سامی، بەڵام تاوەکو ئێستا بڕیاری نەداوە و داوای جێبەجێکردنی مەرجەکان دەکات؛ کە 120 ملیار داهاتی نانەوتی و هەناردەکردنەوەی نەوتە".

 

لە ماوەی چوار مانگی رابردوودا، فەرمانبەرانی هەرێمی کوردستان تەنیا یەک مووچەیان وەرگرتووە؛ دوایین جار 24ـی تەممووز بوو کە مووچەی مانگی ئایار نێردرا و رۆژی دواتر دابەشکرا.