پزیشکێک لە کۆبانی: لە دۆخێکی کارەساتبارداین

 

لۆرین عەبۆ، پزیشک و کارمەندی کارگێڕی نەخۆشخانەی مشتەنوور لە کۆبانێ، پەیامێکی ڤیدیۆیی بۆ تۆڕی میدیایی رووداو ناردووە و داوای گەیاندنی هاوکاری بەپەلە بۆ نەخۆشخانەکان دەکات. 

 

لۆرین عەبۆ دەڵێت: "دۆخەکە لای ئێمە بەڕاستی کارەساتبارە." ئاماژە بەوەش دەکات، نەخۆشخانەکەیان سەرباری هەموو گوشارەکانی سەری، نەخۆش لە ناوچەی تل سەمەن و گوندەکانی دەوروبەریشیان روو لە نەخۆشخانەکەیان دەکەن. هۆکارەکەشی بەهۆی لەکارکەوتن و نەمانی دەرمان و پێداویستیی نەخۆشخانە و بنکە تەندروستییەکانی دیکەی کۆبانێ دەگەڕێنێتەوە. 

 

لە بەشێکی پەیامە ڤیدیۆییەکەی لۆرین عەبۆ داوا دەکات و دەڵێت: "دەمانەوێت لەم دۆخەی ئێستادا هەموو گەل لەگەڵمان بوەستێت. ئەو دۆخەی ئێستا تێیداین، تەنیا خودا دەزانێت چەندە کارەساتبارە؛ کارەبا نییە، ئاو نییە، ئینتەرنێت نییە و لە هەموو جیهان دابڕاوین."  

 

 

لە کۆتایی پەیامەکەیدا دەشڵێت: "سەرباری ئەوەی دەرمانمان خەریکە نامێنێت، بەڵام وەک نەخۆشخانەیەکی ناوەندی لێرە لە کۆبانی بەردەوامین لەسەر کارەکانمان و پزیشکەکانیشمان لێرەن."

 

دکتۆر ئەڤین خەلیل، یەکێکە لە پزیشکەکانی نەخۆشخانەی مشتەنوور لە کۆبانێ، ئەویش لە پەیامێکی ڤیدیۆییدا باسی دۆخی نەخۆشخانەکە و کۆبانێ دەکات. 

 

ئەڤین خەلیل دەڵێت: "وەک دەزانن، لە سەرەتادا ئەوانەی لە حەلەبەوە هاتبوون، خەڵکی شێخ مەقسوود و ئەشرەفییە بوون. پاشان خەڵکی رەققە و تەبقە دەستیان پێکرد و ئەوانیش هاتنە ئێرە."

 

لە پەیامەکەیدا دەشڵێت: "دوای ئەوانیش خەڵکی گوندەکانی خۆمان، ئەوانەی نزیک هێڵی بەرەی جەنگ بوون، کۆچبەر بوون و هاتنە ناو جەرگەی شار. ئێستا شارەکەمان لە هەموو لایەکەوە گەمارۆ دراوە و زۆر بە تەنیا ماوینەتەوە. پێویستمان بە هەموو جۆرە هاوکارییەک هەیە بۆ ئەوەی گیانی نەخۆشەکان رزگار بکەین."