دەزگای خێرخوازیی بارزانی: 18 بارهەڵگر هاوکاریمان دەگاتە رۆژئاوا و باکووری کوردستان

 

بەگوێرەی نوێترین راپۆرتی دەزگای خێرخوازیی بارزانی، تاوەکو 24ـی ئاداری 2023، دەزگاکە هاوکاریی مرۆیی گەیاندووەتە 339 هەزار و 136 خێزان؛ زۆرترین خێزانی سوودمەندبووش لە هاوکارییە مرۆییەکان لە شاری مەڕەش بوون، کە زیاتر لە 102 هەزار خێزان بوون، هەروەها لە عەفرین و دەوروبەری لە رۆژئاوای کوردستان، 58 هەزار و 403 خێزان هاوکاری مرۆیی کراون لەلایەن دەزگاکەوە.

 

رۆژی شەممە 25ـی ئاداری 2023، رەواج حاجی، ئەندامی دەستەی کارگێڕیی دەزگای خێرخوازیی بارزانی و بەرپرسی دۆسییەی سووریا لە دەزگاکە بە تۆڕی میدیایی رووداوی گوت "هاوکارییەکانمان بۆ باکوور و رۆژئاوای کوردستان بەردەوامن؛ ئەمڕۆ 18 بارهەڵگرمان دەگەنە ئەو ناوچانەی بەهۆی بوومەلەرزەکەوە پێویستیان بە هاوکارییە؛ 13 بارهەڵگریان بۆ سنووری عەفرینە و ئەوەی دیکەش بۆ باکووری کوردستانە".

 

رەواج حاجی گوتی، لە باکووری کوردستان ئامادەکردنی خواردنی گەرم بۆ خەڵکی شارەکانی مەرەش و ئامەد بەردەوامە و لە هاتای تورکیاش ناوەندێکی هاوکارییان کردووەتەوە.

 

سەبارەت بە عەفرین و دەوروبەری، بەرپرسی دۆسیەی سووریا لە دەزگای خێرخوازیی بارزانی دەڵێت، هاوکاری جیا پێشکێشی زیانلێکەوتووان دەکەن، بەتایبەت خزمەتگوزاریی تەندروستی بۆ دانیشتوانی گوند و شارۆچکەکانی سنووری عەفرین.

 

جگە لە بوومەلەرزەکانی شەشی شوباتی 2023، شەوی 14ـی ئادار، لافاو چەند ناوچەیەکی لە باکووری کوردستان گرتەوە کە زیانی گیانی و مادی بەدواوە بوو. رەواج حاجی دەڵێ، دەزگاکەیان هاوکاریی گەیاندووەتەوە زیانلێکەوتووانی لافاوەکەی رووهای باکووری کوردستان.

 

 

 - ژەمە خۆراکی گەرم

- بەتانی، دۆشەک و سەرین

- ئاوی خواردنەوە

- ژەمە خۆراکی وشک

- ژەمە خۆراکی خێرا

- هاوکاریی پزیشکی

- جلوبەرگی جۆراوجۆر

- خێوەت

- پارەی کاش

- پاکێجی منداڵان و شیری منداڵان

- خەڵووز

- پێویستیی نێوماڵ

- ئامێری بیناسازی

 

 

 - مەڕەش

- سەمسوور

- دیلۆک

- رووها

- ئامەد

-سەمسوور

- مەلەتی

- عەفرین

 - سلۆپی

- نوسێبین

- ئەدەنە

- هاتای

 

رۆژی 6ـی شوباتی 2023، بوومەلەرزەیەکی بەهێز لە باکووری کوردستان روویدا، کە کاریگەریی لەسەر تورکیا، رۆژئاوای کوردستان و سووریاش هەبوو؛ بوومەلەرزەکە بووە هۆی گیانلەدەستدانی زیاتر لە 55 هەزار کەس لە سەرجەم ناوچە زیانلێکەوتووەکان.