وەزارەتی کارەبا: کوژانەوەی گشتی لە هەرێمی کوردستان روویدا

 

بەرەبەیانیی پێنجشەممە، 26-03-2026، وەزارەتی کارەبای هەرێمی کوردستان لە راگەیێندراوێکدا هاونیشتمانییانی ئاگادارکردەوە کە بەهۆی کێشەیەکی تەکنیکی لە هێڵەکانی گواستنەوە، کارەبا لە سەرتاسەری هەرێمی کوردستان بڕاوە.

 

لە راگەیێندراوەکەدا هاتووە: "لە ئێستادا تیمەکانی وەزارەتی کارەبا سەرقاڵی لێکۆڵینەوەن لە هۆکاری کێشەکە بۆ ئەوەی بەزووترین کات چارەسەری بکەن."

 

هەروەها لەبارەی "کوژانەوە گشتییەکە" شەعبان ئیبراهیم، بەڕێوەبەری کۆنترۆڵی کارەبای دهۆک بە رووداوی گوت: "هۆکاری کوژانەوەکە تەکنیکی بووە، سەرقاڵی چارەسەرن."

 

شەعبان ئیبراهیم گوتی: "هۆکاری کێشەکەش، کەوتنی چەند ستوونێکی کارەبا بووە کە گومان دەکرێت بەهۆی رۆچوونی زەوی لەدوای بارانبارین روویدابێت."

 

بەڕێوەبەری کۆنترۆڵی کارەبای دهۆک: "ئەم کوژانەوەیە بەشێک پارێزگای هەولێریشی گرتووەتەوە چونکە نزیکەی 400 مێگاوات کارەبای دهۆک لە هەولێرەوە دێت و ئەو بڕە ئێستا پێمان ناگات، ڤۆلتیەی وێستگەکانی باعەدرێ و کواشێش کەمیان کردووە و کوژاونەتەوە." 

 

هەروەها لە راگەیێندراوەکەی وەزارەتی کارەبا دا هاتبوو: کارەبا بۆ هاونیشتمانییان "لە چەند کاتژمێری داهاتوودا" دەگەڕێتەوە.

 

وەزارەتی کارەبا جەختیشی کردووەتەوە کە لەگەڵ هەر پێشهاتێکی نوێ و نزیکبوونەوە لە چاککردنەوەی تەواوەتیی گرفتەکە، هاونیشتمانییان لە وردەکارییەکان ئاگادار دەکەنەوە.