عەبدوڵڵا کوێخا موبارەک: ناهێڵین خوێنی ئەم کوڕەی خۆمان بە فیڕۆ بڕوات

 

عەبدوڵڵای کوێخا موبارەک بە تایبەت لە رێگەی تۆڕی میدیایی رووداوەوە پەیامی دانبەخۆداگرتنی بۆ کەسوکارەکەی نارد و گوتی، "ئێمە بەڵێن بە خەڵکی خۆمان دەدەین، ناهێڵین خوێنی ئەم کوڕەی خۆمان بە فیڕۆ بڕوات، بەڵێن بە خزم و کەسوکاری خۆشەویستمان دەدەین، بەڵام لەگەڵ ئەو چەند کەسە دیاریکراوەدا، ئەگینا لەگەڵ هیچ هێز و لایەنێک کێشەیەکمان نییە. بارودۆخی ئەمڕۆی هەرێمی کوردستان و ئارامیی چەمچەماڵ لە رووحی منیش گرنگترە نەک هەر کوڕەکەم."

 

کامێراکانی چاودێری و شاهێدحاڵەکان دیمەنی ساتی رووداوەکەیان بۆ هێزە ئەمنییەمان کردووەتە دۆسییە و دادوەریش فەرمانی دەستگیرکردنی چەند کەسێکی بۆ پۆلیس ناردووە.

 

 

بەهجەت وەهاب، مامۆستای ئایینی لە رێوڕەسمی بەخاکسپاردنی تەرمی سەرهەد رایگەیاند، "هەموومان دەزانین خوای گەورە لە قورئانی پیرۆزدا کاتێک باسی بەڵا و ناخۆشی کردووە، فێری ئارامگرتن و سەبرمان دەکات، فێرمان دەکات کە مرۆڤی موسڵمان دەبێ ئارامبگرێ لە بەڵا و موسیبەتەکان، چونکە مرۆڤ کە هاتە دونیاوە، تووشی دەیان کێشە و گرفت دەبێت."

 

هەردوو بنەماڵەی ناکۆک خزم و نزیکی یەکدین، لە کاردانەوەی کوژرانی کوڕەکەیاندا، کەسوکاری عەبدوڵڵای کوێخا موبارەک خانوو و ماڵی یەکێک لە تەقەکەرەکانیان سووتاند.

 

سەرهەد لەدایکبووی ساڵی 2001 بووە، دوای ئەوەی تەقەی لێکراوە، دەستبەجێ گیانی لەدەستداوە.