سامانی ماسی: نەخۆشیی کەڕووی ماسی بڵاوبووەتەوە

 

 

رۆژی یەکشەممە، 25ـی ئایاری 2025، بێستوون نەجمەدین بە تۆڕی میدیایی راگەیاند: "ساڵانە ئەم کاتانە بەشێک لە نەخۆشییەکانی ماسی سەرهەڵدەدەن، نەخۆشیی کەڕوو یەکێکە لە نەخۆشییە باوەکان کە بەھۆی نەگۆڕینی ئاوی حەوزی ماسی، خراپ ئیدارەدان، خراپی کوالێتیی عەلەف و دابیننەکردنی ئۆکسجین بۆ ماسییەکان دروستدەبێت، ھەروەھا پشکنین بۆ ماسییەکان ناکرێت کە پێویستە ھەفتەی جارێک بکرێت."

 

بەڕێوەبەری سامانی ماسی لە وەزارەتی کشتوکاڵ دەڵێت: "بەرهەمهێنەرانی ماسی کەمتەرخەمن و تاوەکو ماسییەکان سەر ئاو نەکەون هەستی پێناکەن، ئەگەر بەردەوام پشکنین بۆ ماسییەکان بکەن ئەوە زوو لەم نەخۆشییە ئاگادار دەبن و دەتوانن چارەسەری بکەن."

 

زۆرترین بەرهەمی ماسی لە ھەرێمی کوردستان لە سنووری تەقتەقە لە پارێزگای ھەولێر. بە گوتەی بێستوون نەجمەدین، نەخۆشییەکە زوو دەگوازرێتەوە ئێستا لە تەقتەق هەستی پێکراوە و چەندین ماسی لەناوبردوە. باسی لەوە کرد: "پێویستە خاوەن پڕۆژەکانی بەرهەمهێنانی ماسی ئاگادار بن و ئەم ماوەیە بەردەوام پشکنین بۆ ماسییەکان بکەن."

 

لە تەواوی ھەرێمی کوردستان 420 پڕۆژەی بەرهەمهێنانی ماسی ھەن کە مۆڵەتی فەرمییان ھەیە و بەرهەمی ساڵانەیان 4,700 تۆنە، تەنیا لە تەقتەق نزیکەی 1,500 حەوزی ماسی ھەن و بەرھەمەکەی مانگەکانی 10، 11 و 12 پێدەگات.

 

بەگوێرەی بەڕێوەبەرایەتیی سامانی ئاژەڵ، ھەرێمی کوردستان ساڵانە پێویستی بە نزیکەی 80,000 تۆن ماسییە، زۆرینەی بەرهەمی نێوخۆییە و ئەوەشی دەمێنێتەوە بە شێوەی زیندوو و بەستوو ھاوردە دەکرێت.