لە سەیدسادق هاونیشتمانییەک کوژرا

 

 

سەرکەوت ئەحمەد، گوتەبێژی پۆلیسی سلێمانی ئەمڕۆ بە ئەرکان عەلی، پەیامنێری تۆڕی میدیایی رووداوی گوت: "لە نێوان کوژراو و بکوژەکاندا دەمەقاڵێ دروستبووە و رووداوەکەی لێکەوتووەتەوە".

 

رووداوەکە شەوی رابردوو روویداوە. بە گوتەی گوتەبێژی پۆلیسی سلێمانی بۆ رووداو، کوژراوەکە ئاسەواری لێدان بە سەرییەوە بووە و سەرەتا بریندار بووە، دوای گەیاندنی بە نەخۆشخانە گیانی لەدەستداوە.

 

کوڕی کوژراوەکە بە پۆلیسی سلێمانی گوتووە، باوکی لەگەڵ تۆمەتبارەکاندا پێشتر کێشەی هەبووە.

 

بەپێی زانیارییەکان، کوژراوەکە ناوی (ب. س) و تەمەنی سەروو 50 ساڵە، سەرقاڵی کاری ئاژەڵداری بووە.

 

پۆلیس دوو تۆمەتباری بە تۆمەتی کوشتنی ئەو هاونیشتمانییە دەستگیر کردووە و پەڕاوی لێکۆڵینەوەی بۆ رووداوەکە کردووەتەوە.