لە تاران وێنەی ژنانی بێ سەرپۆش زیاتر دەبیندرێ؛ 'ئاوا ئاسوودەترم'

 

لەپشت دیمەنە ئارامەکەوە، شوێنەواری جەنگ و هەنگاوەکانی دەسەڵات دوای جەنگەکە بە روونی دەبیندرێن.

 

سیامەک دەروێشی میوەفرۆشە و باس لە بۆردوومانێکی ئیسرائیل دەکات و دەڵێت، "دوای تەقینەوەکە، سەرم و گوێم بریندار بوون. سەرئێشەیەکی تووندم هەیە و پێویستە دابنیشم و جگەرەیەک بکێشم."

 

بەرپرسانی باڵای ئێران دەڵێن، سیخوڕەکان یارمەتیدەرێکی گەورەی ئیسرائیل بوون لەو جەنگەدا.

 

لە حوزەیرانەوە هێزە ئەمنییەکانی ئێران زیاتر لە 20,000 کەسیان دەستگیرکردووە؛ زۆربەیان بە تۆمەتی "سیخوڕیکردن بۆ ئیسرائیل".

 

رێکخراوی ئەمنێستی ئینتەرناشناڵ دەڵێ، تەنیا ئەم ساڵ زیاتر لە 1,000 کەس لە ئێران لەسێدارەدراون. بە گوێرەی نەتەوە یەکگرتووەکان، بەشێکیان زیندانیی سیاسی، چالاکڤان و خۆپێشاندەری گەنج بوون.

 

بەڵام جووڵەیەکی دیکەش لە ئێران لە گەشەکردندایە. ئێستا لە شەقامەکانی تاران، وێنەی ژنانی بێ سەرپۆش زیاتر لە هەر کاتێکی دیکە بەدی دەکرێ.

 

حەنانە، هاووڵاتییەکی ئێرانە و باس لەوە دەکات، "ئاوا هەست بە ئازادی زیاتر دەکەم و زیاتر ئاسوودەترم. زۆر بێزارم لەوەی شتێک بە ناچاری پێم بکرێ."

 

مەسعود پزیشکیان، سەرۆککۆماری ئێران چەندین جار رایگەیاندووە، ئامادە نییە یاسای باڵاپۆشی جێبەجێ بکات، چونکە وەک خۆی دەڵێ، دژی ویستی خەڵکە.