دەروازەکانی حاجی ئۆمەران و باشماخ: لە سەری ساڵدا هاتووچۆ راناگیرێت

 

سیروان حوسێن، گوتەبێژی دەروازەی نێودەوڵەتیی حاجی ئۆمەران لە پارێزگای هەولێر، ئەمڕۆ پێنجشەممە بە تۆڕی میدیایی رووداوی گوت: "بەهۆی سەری ساڵەوە هیچ رۆژێک هاتووچۆی (بازرگانی، کۆڵبەری و گەشتیاری) لە دەروازەکەمانەوە راناگیرێت و ئاسایی دەبێت".

 

هەر ئەمڕۆ، بەرپرسێک لە دەروازەی نێودەڵەتیی باشماخ لە پارێزگای سلێمانی بە رووداوی گوت: "پشووەکانی سەری ساڵ کاری دەروازەکە ناگریتەوە، هاتووچۆی گەشتیاری و بازرگانی بەردەوام دەبێت".

 

بەگوێرەی حکومەتی هەرێمی کوردستان، بەهۆی سەری ساڵەوە لە ئەمڕۆوە پشوو دەستپێدەکات و 03-01-2025 دوایین رۆژی دەبێت و 04ـی هەمان مانگ دەوام ئاسایی دەبێتەوە.

 

دەروازەی حاجی ئۆمەران، لەنێوان ناحیەی حاجی ئۆمەران لە سنووری پارێزگای هەولێر و پیرانشاری رۆژهەڵاتی کوردستاندایە. دەروازەی باشماخیش، لەنێوان قەزای پێنجوێن و شاری مەریوانی رۆژهەڵاتی کوردستاندایە.