هەرێمی كوردستان سەردانیکردنی پێنج وڵات لە سنوورەکانییەوە قەدەخە دەکات
رووداو - هەولێر
وەزارەتی ناوخۆی هەرێمی كوردستان لە راگەیێندراوێکدا سەردانیکردن بۆ پێنج وڵات لە سنوورەكانییەوە قەدەخە دەکات کە هەریەکە لە تایلەند، كۆریای باشوور، ژاپۆن، ئیتاڵیا و سەنگاپوور ـن.
ئەو راگەیێندراوەی وەزارەتی ناوخۆی هەرێمی کوردستان لە چوارچێوەی رێکارەکانی حکومەتی هەرێمی کوردستانە بۆ پێشگیری لە بڵاوبوونەوەی ڤایرۆسی کۆرۆنا و تێیدا هاتووە "بڕیارماندا بە راگرتنی پێدانی ڤیزە و هاتنەژوورەوە بە هەڵگرانی پاسپۆرتی وڵاتانی، تایلەند، کۆریای باشوور، یابان، ئیتاڵیا و سەنگاپوور".
هەر لە راگەیێندراوەکەدا وەزارەتی ناوخۆ قەدەخەکردنی گەشتکردنی هەڵگری پاسپۆرتی عێراقی لە رێگەی خاڵە سنوورییەکانی هەرێمی کوردستان بۆ ئەو وڵاتانە راگەیاندووە.
سەبارەت بەو هاونیشتمانییانەی لەدوای 1-1-2020 سەردانی ئەو وڵاتانە یان ئێرانیان کردووە و گەڕاونەتەوە، وەزارەتی ناوخۆ دەڵێت، لەکاتی گەڕانەوە پشکنینی سەرەتاییان بۆدەکرێت لە فڕۆکەخانە و دواتر رەوانەی قەرەنتینە دەکرێن.
هەر هاووڵاتییەکیش لە وڵاتەکانی، چین، ئێران، تایلەند، کۆریای باشوور، یابان، ئیتاڵیا و سەنگاپوور گەڕابنەوە رێگەیان پێنادرێت سەردانی هەرێمی کوردستان بکەن.
سەبارەت بە شاندی فەرمی ئەو وڵاتانە، وەزارەتی ناوخۆ دەڵێت، بەڕێزەوە مامەڵەیان لەگەڵدەکرێت و لەلایەن تیمی تەندروستیی تایمەتمەندەوە پشکنینیان بۆ دەکرێت.