وەزارەتی تەندروستی بۆ رووداو: سێ سووریایی تووشبووی ئایدز لە هەولێر تۆمارکران و دیپۆرت کرانەوە

 

 

‎ئەمڕۆ دووشەممە، وەزارەتی تەندروستی هەرێمی کوردستان رایگەیاند، "دوای پشکنینی تاقیگەیی رۆژانە بۆ کارمەندانی شوێنە گشتیەکان و دەرهێنان و نوێکردنەوەی مۆڵەتی تەندروستی، لەلایەن تاقیگەی تەندروستی گشتی، سێ حاڵەتی هەڵگری ڤایرۆسی HIV  بۆ تووشبوون بە نەخۆشی ئایدز لەلایەن تیمەکانی تەندروستی دەستنیشانکرا، کە لە ساڵۆنەکانی ئافرەتان کاریان دەکرد و هەموویان بیانی بوون و لایەنی پەیوەنداری لێ ئاگادارکرایەوە و رێککاری پێویست وەرگیرا."

 

دکتۆر کاوە خەلیل، بەڕێوەبەری گشتیی کاروباری تەندروستی لە وەزارەتی تەندروستی بە تۆڕی میدیایی رووداوی راگەیاند، "هەڵمەتەکە بەبۆنەی نزیکبوونەوەی جەژنی قوربان کرا، دوای ئەوەی کارمەندی ساڵۆنەکان هاتوون بۆ دەرهێنانی مۆڵەت و دوای ئەنجامدانی پشکنین بۆیان، دەرکەوتووە سێ کارمەند کە مۆڵەتیان نەبوو، تووشبووی ئایدزن."

 

دکتۆر کاوە خەلیل گوتی، "ئەو سێ کارمەندە خەڵکی سووریا بوون و دوای دەرچوونی ئەنجامی پشکنینەکان دیپۆرتی سووریا کرانەوە، شەش ساڵۆنیش بەهۆی نەبوونی هیچ مۆڵەتێکی تەندروستی داخران."

 

‎وەزارەتی تەندروستی هاونیشتمانیان ئاگاداردەکاتەوە، خۆیان دوور بگرن لە شوێنی نافەرمی، پێویستە سەردانی شوێنی فەرمی بکەن و لە شوێنە گشتییەکان پرسیاری مۆڵەتی تەندروستی بکەن، لە هەر گومانێک لە نەبوونی مۆڵەت یان دیاردەیەکی ناتەندروست لە رێگەی هێڵە گەرمەکانی پەیوەندی یان سندووقی سکاڵا تیمەکانی تەندروستی ئاگادار بکەنەوە.