هۆشیار زێباری: هیچ هێڵێکی سوورمان لەسەر هیچ بەربژێرێکی پۆستە باڵاکانی عێراق نییە

 

رۆژی چوارشەممە، 26ی تشرینی دووەمی 2025 هۆشیار زێباری لە کۆبوونەوەیەکی ئۆنلایندا بە ناونیشانی (هەڵبژاردنەکانی 2025ی عێراق: دواتر چی؟) کە لەلایەن پەیمانگەی (چاتام هاوس)ـوە رێکخرابوو، باسی لە دۆخی دوای هەڵبژاردنەکانی عێراق و هەڵوێستی پارتی کرد.

 

لە وەڵامی پرسیارێکی عەلی جاف، بەڕێوەبەری پەیوەندییە گشتییەکانی رووداو، سەبارەت بەوەی ئایا پارتی ڤیتۆی لەسەر هیچ بەربژێرێک هەیە بۆ پۆستە باڵاکان، هۆشیار زێباری گوتی: "هەڵوێستی ئێمە ئەوەیە، ئێمە هێڵێکی سوورمان نییە. مامەڵە لەگەڵ هەر کەسێک دەکەین کە نوێنەرەکانیان هەڵیاندەبژێرن یان دەستنیشانی دەکەن."

 

هۆشیار زێباری گوتی: "بێگومان چوارچێوەی هاوئاهەنگی گەورەترین بلۆکە، ئەوان سەرۆکوەزیرانی داهاتوو هەڵدەبژێرن و بڕیاری لەسەر دەدەن. بێگومان رێزی ئەوە دەگرین."

 

ئەندامی دەستەی کارگێڕیی مەکتەبی سیاسیی پارتی جەختی لە پێویستیی بوونی حکومەتێکی بەهێز کردەوە و گوتی: "بۆ عێراق، نەک هەر بۆ کوردستان، ئێمە پێویستیمان بە حکومەتێکی بەهێز هەیە، حکومەتێکی بڕیاردەر کە هەنگاو بنێت لەبارەی ئاڵنگارییەکان، خزمەتگوزارییەکان، ئاسایش، ئابووری و پرسی دارایی ساڵانە کە رووبەڕووی وڵاتەکە دەبێتەوە."

 

کۆبوونەوەکەی چاتام هاوس بۆ تاوتوێکردنی دەرئەنجامە سیاسی، حکومی و کۆمەڵایەتییەکانی هەڵبژاردنی 2025ی عێراق بوو. لە کاتێکدا هەڵبژاردنەکە هیچ براوەیەکی روونی نەبووە، ئەمەش بووەتە هۆی ئەوەی پرۆسەی پێکهێنانی حکومەت دژوار بێت.