وەزارەتی سامانە سرووشتییەکان و کارەبا: تەواوی هەناردەی گاز بۆ وێستگەکانی کارەبا بڕا

 

راگەیێندراوەکە دەڵێت، هێرشەکە کاژێر 11:30 خولەک بە درۆن کراوە و تیمەکانی هەردوو وەزارەتەکە لەسەر هێڵن بۆ بەدواداچوونی لێکەوتەکانی هێرشەکە.

 

ئەمشەو هێرشکرایە سەر کێڵگەی ‌گازی کۆرمۆر لە سنووری قەزای چەمچەماڵ و ئاگرێکی گەورە لە کێڵگەکە بەرز دەبێتەوە.  

 

سەرچاوەیەکی ئەمنی بە رووداوی راگەیاند، ئێڵپیجی پلانت بۆردوومان کراوە و زیانی گیانی نەبووە.

 

شایەتحاڵێک لە نزیک کێڵگەکە بە رووداوی راگەیاند، "پێش هێرشەکە زەنگی ئاگادارکردنەوە لێی دا و کێڵەگەکە چۆڵکرا. هێرشەکە زیانی گیانی نەبووە و تەنیا لە کۆگەیەکی داوە". 

 

بەگوێرەی پەیامنێری رووداو، کۆگەکانی کێڵگەکە سووتاون و رێگریی لە فراوانبوونی ئاگرەکە کراوە. کۆمپانیاکان کارمەندەکانیان بەسەردەکەنەوە. 

 

کێڵگەکە سەرچاوەیەکەی سەرەکییە بۆ بەرهەمهێنانی کارەبای هەرێمی کوردستان. 

 

ئومێد ئەحمەد، گوتەبێژی وەزارەتی کارەبا بە رووداوی راگەیاند، 80%ـی کارەبای هەرێمی کوردستان دەکوژێتەوە.