وه‌زاره‌تی خوێندنی باڵا 15 پۆست له‌ زانكۆی پۆلەتەکنیکی دهۆک راده‌گه‌یێنێت

 

 

ئەمڕۆ پێنجشەممە 27-01-2022 وەزارەتى خوێندنى باڵا و توێژینەوەى زانستى لە چوارچێوەى رێنماییەکاندا 15 پۆست رادەگەیێنێت. عەباس ئەکرەم، گوتەبێژی وەزارەتەکە بە رووداوی گوت: "ئەوە یەکەمجارە ئەو پۆستانە رادەگەیێندرێت، هەر کەسێک ئارەزووى هەیە و مەرجەکانى تێدایە، دەتوانێت لە ماوەى دیاریکراودا (c.v) پێشکێش بکات."

 

پۆستەکان ئەمانەن:

1- یاریدەدەری سەرۆکی زانکۆ بۆ کاروباری قوتابیان

2- یاریدەدەری سەرۆکی زانکۆ بۆ کاروباری زانستی و خوێندنی باڵا

3- یاریدەدەری سەرۆکی زانکۆ بۆ کاروباری کارگێڕی و دارایی

4- راگری کۆلێژی تەکنیکی ئەندازیاری

5- راگری کۆلێژی تەکنیکی کارگێڕیی دهۆک

6- راگری پەیمانگای تەکنیکی کارگێڕیی ئاکرێ

7- راگری کۆلێژی تەکنیکی ئاکرێ

8- راگری پەیمانگای تەکنیکی بەردەڕەش

9- راگری پەیمانگای تەکنیکی دهۆک

10- راگری پەیمانگای تەکنیکی شێخان

11- راگری پەیمانگای تەکنیکی ئامێدی

12- راگری پەیمانگای تەکنیکی زاخۆ

13- راگری پەیمانگای تەکنیکی شنگال

14- راگری پەیمانگای تەکنیکی کارگێڕیی دهۆک

15- بەڕێوەبەری گشتیی سەنتەری توێژینەوە

 

وەزارەتى خوێندنى باڵا و توێژینەوەى زانستى لە راگەیێندراوێکدا مەرجەکانی بۆ پێشکێشکردنی سیڤی بۆ یاریدەدەری سەرۆکی زانکۆ، راگری کۆلێژ و بەڕێوەبەری گشتیی سەنتەری توێژینەوە ئاشکراکردووە، ئەمەش مەرجەکانە:-

1- بڕوانامەی دکتۆرای هەبێت.

2- ناونیشانی زانستی لە پرۆفیسۆری یاریدەدەر کەمتر نەبێ.

3- خزمەتی زانکۆیی لە 10 ساڵ کەمتر نەبێ.

 

مەرجەکان بۆ پۆستى راگری پەیمانگا: 

1- بڕوانامەی لە ماستەر کەمتر نەبێت بە پلەی مامۆستا.

2- خزمەتی زانکۆیی لە 10 ساڵ کەمتر نەبێت.

 

لە راگەیێندراوەکەی وەزارەتی خوێندنی باڵادا زیاتر هاتووە: "ئەو کەسەی داواکاری پێشکێش دەکات، باشترە دید و بۆچوون و بەرنامەى کاری خۆى پێشکێش بکات بۆ بەرەو پێشبردنى زانکۆ و کۆلێژ و پەیمانگە بۆ ئەو چوار ساڵەى کە پۆستەکە وەردەگرێت، زانینی زمانى ئینگلیزى و شارەزایی لە بەکارهێنانى کۆمپیوتەر هەلى زیاتر بۆ پیشکێشکار دەڕەخسێنیت. هەروەها  ئاماژەی بەوە کردووە کە بۆ پێشکێشکردنى (c.v) و پوختەى راژە، کۆتایی دەوامى رێککەوتى 03-02-2022 رۆژی پێنجشەممە دەبێت".

 

وەزارەتی خوێندنی باڵا ئاماژەی بەوەشکردووە، پێویستە لە پوختەى راژەدا خزمەتی زانکۆیی بنووسرێت و پەسندکراوى سەرۆکایەتی زانکۆ بێت.