لە سنووری راپەڕین ئۆتۆمبێلێک 'بۆردوومان کرا' و چوار کەس گیانیان لەدەستدا

سۆلین حەمەدەمین
 
رووداو دیجیتاڵ 

گوتەبێژی پۆلیسی راپەرین رایگەیاند، لە سنووری راپەڕین بەهۆی بۆردوومانێکەوە کە لە رێگەی دۆرنەوە کراوە،  چوار کەس گیانیان لەدەستدا و کەسێکیش بریندارە.
 
دووشەممە، 27ـی کانوونی دووەمی 2025، دەرو قادر گوتەبێژی پۆلیسی راپەرین بە تۆڕی میدیایی رووداو گوت: " لە سنووری چوارقورنە درۆنێک ئۆتومبێلێکی جۆری تۆیۆتا لاندگرۆزی بۆردوومان کردووە، بەهۆیەوە چوار کەس گیانیان لەدەستداوە."
 
بۆردوومانەکە لە بەردەم چێشتخانەیەکی گوندی گردجان بووە، لەسەر دووسایدی چوارقوڕنە - خەلەکان. 
 
سەبارەت بە ناسنامەی قوربانییەکان، گوتەبێژی پۆلیسی راپەرین دەڵێت: "تائێستا ناسنامەیان دیار نییە، پشیکنینیان بۆ دەکرێت بۆ ناسینەوەیان."

 

 
هەروەها عەمید مستەفا رەسووڵ، بەڕێوەبەری پۆلیسی راپەڕین بە رووداوی گوت: "کەسێک ماتۆڕسواربووە ئەو کاتە بەوێدا رۆشتووە کە ئاگری گرتووە ئەویش بریندارە، بەڵام برینەکەی سووکە."
 
بەڕێوەبەری پۆلیسی راپەڕین دەڵێت: "ئەوانەی گیانیان لەدەستداوە دووانیان ئافرەتن و دووانەکەی دیکەش پیاون و تابلۆی ئۆتۆمبێلەکە سلێمانییە."
 
بە گوێرەی زانیارییەکان، ئەوانەی گیانیان لەدەستداوە، خەڵکی رۆژئاوای کوردستانن
 

 
شایەتحاڵێک کە بە گوتەی خۆی 50 مەترێک لە شوینی رووداوەکە دووربووە، بە رووداوی راگەیاند: "دوو لە قوربانیان لە ئەنجامی بۆردوومانەکە پارچە پارچە بوون. شوفێری ئۆتۆمبێلەکەش سووتا."
 
ئەو شایەتحاڵە گوتیشی: "گوێمان لە دەنگێکی بەرز بوو، درۆنێکمان بینی، سەرەتا رۆیشت و دواتر جارێکی دیکە گەڕایەوە."