کازم فارووق: کاتێک راستییەکان بڵاودەکەمەوە کەسانێک باجی قورس بدەن

 

کازم فارووق، سەرۆکی فراکسیۆنی نەوەی نوێ لە خولی پێنجەمی پەرلەمانی کوردستان کە پێش کۆتاییهاتنی خولەکە بەهۆی کێشەی تەندروستییەوە پەرلەمان و هەرێمی کوردستانی جێهێشت و لەگەڵ شاسوار عەبدولواحید، سەرۆکی جووڵانەوەی نەوەی نوێ کێشە کەوتە نێوانیانەوە.

 

رۆژی دووشەممە، 26ـی شوباتی 2024، و دوای زیاتر لە هەشت مانگ، لە پەخشێکی راستەوخۆی فەیسبووکدا دەرکەوتەوە.

 

کازم فارووق گوتی، لە ئوردن پزیشکەکان پێیان گوتووە، تەندروستیی باشە، بەڵام هێشتا پێویستی بە چاودێریی دەبێت و داوای لێکراوە بچێتە سەنتەرێکی گەورەی پزیشکی لە یەکێک لە وڵاتانی ئەوروپا.

 

بەبێ ئەوەی ناوی هیچ کەس و لایەنێک بهێنێت، کازم فارووق گوتی: "هەندێک کەس بە باسکردنی ئەم بابەتە [تەندروسی ئەو] تێکدەچن و دەشڵەژێن و بە دەموچاویاندا دەناسرێنەوە؛ لەوە سەیرتر ئەوەیە، لە کۆنگرە رۆژنامەڤانییەکانیاندا پرسیار بۆ رۆژنامەنووسانی سێبەری خۆیان دەنووسنەوە و دەڵێن، لێمان بپرسە دکتۆر کازم بۆ زوو ئەم بابەتە باس ناکات و دەیخاتە کاتێکی دیاریکراوە".

 

سەرۆکی فراکسیۆنی نەوەی نوێ لە خولی پێنجەمی پەرلەمانی کوردستان گوتیشی: "کەسانی بەناو سەربەخۆ و ئێکسپایەری حیزبی دیکە، (رێزم بۆ کەسانی سەربەخۆی دڵسۆزی راستەقینە کە زۆر زۆرن) رایاندەسپێردن و دەڵێن بۆ دکتۆر کازم ئێستا قسە ناکات، بێگومان بۆ من کات جیاوازیی نییە، ئەم دواکەوتنە بەهۆی دۆخی تەندروستیمەوە بووە".

 

پێشتر 12-06-2024 کازم فارووق لە نەخۆشخانەیەکەوە دەرکەوت، بەگوێرەی ئەو ڤیدیۆیەی ئەمڕۆ، تەندروستی باشترە و ئەو لاوازییەی جەستەی نەماوە هەشت مانگ لەمەوبەر هەیبوو.

 

کازم فارووق گوتی: "بۆم روونبووەتەوە {بۆ دەترسن} لە کاتی بڵاوبوونەوەی راستییەکان لەو کاتەی خۆیان باسی دەکەن، چونکە لەو کاتەدا باجەکەی زۆر قورسە لەسەر شانیان، ئێستا بێت بە سۆشیاڵ میدیا و کۆمێنتی فەیسبووک لە سزای رای گشتی رزگاریان دەبێت".

 

هەروەها ئاماژەی بەوەشکرد، لە چەند رۆژی داهاتوودا ئوردن جێدەهێڵێت و بچێتە هەر وڵاتێک خەڵک لە دۆخی خۆی ئاگادار دەکاتەوە و "چالاکییەکان"ـی دەستپێدەکاتەوە.

 

رۆژی 27ی شوباتی 2022، کازم فارووق دەستلەکارکێشانەوەی خۆی پێشکێشی سەرۆکایەتیی پەرلەمان کرد و لە دوای ئەو کاتەوە چەندین مانگ دەرنەکەوت. دواتر و لە رۆژی 27-10-2022، زوهێر فارووق، برای کازم فارووق بە رووداوی راگەیاند: "تەندروستیی کازم جێگیر نییە و بە ئامێر هەناسە دەدات." 

 

دوو رۆژ دواتر و لە رۆژی 29-10-2022، شاسوار عەبدولواحید، سەرۆکی جووڵانەوەی نەوەی نوێ لە کۆنگرەیەکی رۆژنامەڤانیدا هەموو ئەو دەنگۆیانەی رەتکردەوە کە لەبارەی تەندروستیی دکتۆر کازم فارووق دەگوترێن.

 

سەرۆکی جووڵانەوەکە گوتی: "هەمووی درۆ و دەلەسەیە" و گوتیشی، "دکتۆر کازم لەگەڵ خێزانەکەی و دوو منداڵەکەی لە بەریتانیا دەژین". ئاماژەی بەوەش دا تاوەکو ئەوکاتە دکتۆر کازم خۆی قسە نەکات، ئەو هیچ لەبارەی تەندروستییەوە ناڵێت و گوتیشی: "دکتۆر کازم هیچ پەیوەندییەکی بە ئێمەوە نەماوە." 

 

رۆژی 30-10-2022، ئەختەر ئەحمەد، دایکی دکتۆر کازم گوتی، لە دەرەوەی وڵات پزیشکەکان پێیانگوتوون "کوڕەکەتان ژەهرخواردکراوە.. هەوڵدەدەین چارەسەری بکەین."