سانای مام یوسف: لە دادگە بێتاوانی خۆم بۆ هەمووان دەسەلمێنم

 

 

سانای مام یوسف، کچە مۆدێلی کورد، دوای دەستگیرکردنی لەسەر سکاڵایەکی بەڕێوەبەرایەتی گشتی کاروباری شەهیدان و ئەنفالکراوانی هەڵەبجە بە تۆمەتی سوکایەتیکردن بە قوربانیانی هەڵەبجە، رۆژی یەکشەممە 27-3-2022 بە کەفالەت ئازادکرا.

 

رۆژی یەکشەممە 27-3-2022، سانای مام یوسف بە تۆڕی میدیایی رووداوی گوت، "هەرکەسێک دوێنێ گوتبێتی ئازادکراوم ناڕاستە، بەڵکو ئەمڕۆ لە زیندان ئازاد بووم". سانای مام یوسف دەڵێت، لە زینداندا بە تەنیا لە ژوورێکدا بووە و زۆر بەڕێزەوە مامەڵەی لەگەڵ کراوە.

 

سەبارەت بەو تۆمارە دەنگییەی بڵاوبووەوە و لەسەری دەستگیرکرا، سانای مام یوسف وردەکارییەکەی باسکرد و گوتی: "من دووکانی جلوبەرگم هەیە، حەوت گەنج سووکایەتی نەما پێم نەکەن، هەرچی قسەی نەشیاوە پێیانگوتم، بە دایک و باوکیشم، دەشیانگوت ئێمە هەڵەبجەیین و سەیارەکەت دەبینین لای دووکانەکەتدا وەستاندووتە، وادەکەین و وادەکەین، من هەر بلۆکم دەکردن ئەوان بەردەوام بوون لە سووکایەتی، منیش بۆ دوایینجار بلۆکم کردن، مۆبایلەکەم گرێدابووە دەنگی بڵندگۆی دوکانەکەمەوە و میوزیکێکی لەسەربوو، دواتر بیرم چووبوو لای ببەم، تەلەفۆنیان کرد سووکایەتییەکی زۆریان کرد، زۆر شەرمم کرد کە چەند ئافرەتێکی کڕیار لە دووکانەکەمدابوون و گوێیان لێبوو، هەربۆیە ئەو قسانەم کرد بەڕاستی گوشاری زۆر زۆری دەروونیم لەسەربوو".

 

ئەو کچە مۆدێلە زیاتر گوتی: "کاتێک هەندێک وشەی نەشیاو دەڵێم مەبەستم ئەو حەوت کەسەیە نەوەکو هەڵەبجە، من جارێکی دیکە داوای لێبووردن لە هەموو هەڵەبجەییەکان و خەڵکی کوردستان دەکەم، رێز بۆ هەموو قوربانییەکان دادەنێم و هەرگیز مەبەستی بێڕێزیم نەبووە بۆیان".

 

سانای مام یوسف ئاشکرای کرد، ئەویش لە رۆژانی داهاتوودا سکاڵا دژی ئەو گەنجانە لە دادگەی سلێمانی تۆمار دەکات و وەکو خۆی دەڵێت، دەنگی کەسێکیانی تۆمارکردووە، کە چەندە "سووکایەتی" بە خۆی و دایک و باوکی دەکات.

 

سانای مام یوسف گوتی: "حەزدەکەم لە رێگەی رووداوەوە داوای لێبووردن لە هەمووان بکەم، هەڵەبجەم بۆ گرنگە، بەڵام هەموو کوردستانیشم بۆ گرنگە، کە دڵنیایی بدەمە هەمووی، دەبینن بێتاوانی خۆم دەسەلمێنم کە بۆچی ئەو هەڵەیەم کردووە و مەبەستیشم سووکایەتی نەبووە".

 

رۆژی دووشەممە 21-3-2022، لوقمان عەبدولقادر، سەرۆکی کۆمەڵەی قوربانیانی هەڵەبجە، بە تۆڕی میدیایی رووداوی گوت، ئەوان نیگەرانن کە یاسایەک نییە بۆ رێگری لە سووکایەتیکردن بە قوربانیان و گوتی: "وەکو نوێنەری فەرمیی قوربانیانی هەڵەبجە سکاڵای یاسایی دژی هەر کەسێک تۆمار دەکەین، کە سووکایەتی بە قوربانیان و کەسوکاریان بکات".

 

لە تۆمارە دەنگییەکەدا کە بەهۆیەوە سکاڵای دژ تۆمار کرا، سانای مام یوسف دەڵێت: "هەڵەبجەیی......، بەس سەدام باشی دەیناسین ترش و خوێی کردن، ئەو دەستەی خۆشبێت."

 

سەبارەت بەو تۆمارە، رۆژی 21ی ئادار و چەند کاژێرێک بەر لەدەستگیرکردنی، سانای مام یوسف بە تۆڕی میدیایی رووداوی گوت: "ئەو قسانە زۆرن و ئەو کەسە بۆ دژایەتیکردنی من ئەو بەشەی بڵاوکردووەتەوە، کە بەڕادەیەکی زۆر تووڕەی کردبووم، هەڕەشەی کوشتنی لێکردم و بەناوی هەڵەبجەییەوە قسەی نەشیاوی هێندە پێگوتم هیچ دایک و خوشکێکی هەڵەبجەییش قبوڵی ناکەن".

 

هەر ئەو کات و پێش دەستگیردنی سانای مام یوسف داوای لێبووردنی لە هەڵەبجەییەکان کرد، بەڵام داوای لێبووردنەکە نەبووە هۆی کشانەوەی سکاڵاکە لەدژی.