بەهۆی بڵاوبوونەوەی نەخۆشیی هەموو مەیدانەکانی ئاژەڵی پارێزگای ورمێ داخران

 

ئەمڕۆ دووشەممە، 27ی تشرینی یەکەمی 2025، ئومید خەلیلزادە، بەڕێوەبەری ڤێترنەری پارێزگای ورمێ لە رۆژهەڵاتی کوردستان رایگەیاند: "بەمەبەستی رێگریکردن و راگرتنی بڵاوبوونەوەی نەخۆشی تەبەق، سەرجەم بازاڕەکانی فرۆشتنی ئاژەڵ لە پارێزگاکە بۆ ماوەی 4 هەفتە دادەخرێن."

 

ئومید خەلیلزادە گوتی: "لەگەڵ داخستنی مەیدانەکان کوتانی ئاژەڵان و رشاندنی شوێنی مانەوەی ئاژەڵان دەستپێدەکات."

 

چوار ملیۆن و 460 هەزار سەر ئاژەڵ لە پارێزگاکە هەیە کە نزیکە 95٪ ئەو ئاژەڵانە لە 2 هەزار و 900 گوندی پارێزگاکە بەخێو دەکرێن.

 

داخستنی ئەو بازاڕانە لە کاتێکدایە، جۆرێکی گەشەکردووی نەخۆشیی تەبەق لە ئێران و رۆژهەڵاتی کوردستان پەرەی سەندووە و ئاژەڵدارانی رووبەڕووی مەترسیی گیانی و زیانی ئابووری زۆر کردووەتەوە. 

 

عەلیرەزا رەفیعی، جێگری وەزیری کشتوکاڵی ئێران رایگەیاند: "هێنانی ئاژەڵی قاچاخ سەرچاوەی بڵاوبوونەوەی ئەو نەخۆشییەیە."

 

ئاژانسی کاری ئێران لە زاری چەند ئاژەڵدارێکەوە بڵاویکردووەتەوە کە ئەو ڤاکسینانەی بۆ رێگریی لە نەخۆشیی تەبەق هاوردەکراون و وەزارەتی کشتوکاڵ بە ئاژەڵدارانی داوە، هیچ کاریگەرییەکی نەبووە. هەروەها هاتووە، لەکاتێکدا وەزارەتەکە ئاگاداری ئەوە بابەتە بوون، بەڵام هیچ هەوڵێکیان بۆ رزگارکردنی ئاژەڵەکانیان نەداوە و ئێستا دەبێت ئاژەڵداران باجی ئەو کەمتەرخەمییە بدەن.

 

نەخۆشیی تەبەق تووشی ئەو ئاژەڵانە دەبێت كە دووسمن و كاوێژكەرن، وەكو مانگا.

 

دوو شوێنی سەرەكیی ئاژەڵەكە تووشی ئەم پەتایە دەبن؛ نێو دەمی کە لیكێكی زۆر بە دەمیدا دێتە خوارەوە و دواتر دەبێتە بڵقی گەورە و ئازاربەخش، کە وای لێدەكات نەتوانێت بلەوەڕێت، لەگەڵیشیدا تووشی شەلی دەبێت و ناتوانێت بڕوات بەڕێدا.