دۆخی تەندروستیی دوو برینداری رووداوەکەی کەرکووک ناجێگیرە و رەوانەی هەولێر کران

 

 

رۆژی سێشەممە، 28ـی نیسانی 2026، سامان یابە، گوتەبێژی تەندروستیی کەرکووک بە تۆڕی میدیایی رووداوی راگەیاند، "لە هەردوو رووداوی رووخانی باڵەخانەکە و رووداوی هاتووچۆکەی رێگەی کەرکووک - سلێمانی، 38 کەس بریندار بوون. ئێستا 11 کەسیان لە نەخۆشخانە ماون و چارەسەر وەردەگرن، 27 بریندارەکەی دیکە دوای وەرگرتنی چارەسەری پێویست، نەخۆشخانەیان جێهێشتووە و گەڕاونەتەوە ماڵەوە."

 

لەبارەی دۆخی بریندارانی رووداوە هاتووچۆکەی رۆژی 26ـی نیسان، گوتەبێژی تەندروستیی کەرکووک گوتی، "دوو لە بریندارەکان بەهۆی ئەوەی باری تەندروستییان ناجێگیر بوو، رەوانەی نەخۆشخانەکانی هەولێر کراون بۆ وەرگرتنی چارەسەری وردتر."

 

کەرکووک لە کەمتر لە 24 کاژێردا رووبەڕووی دوو رووداوی تراژیدی بووەوە کە تێیاندا 7 کەس گیانیان لەدەستدا و 38 کەسیش بریندار بوون.

 

کاژێر 06:30ی ئێوارەی 26-04-2026 لە رێگەی کەرکووک - سلێمانی، بارهەڵگرێکی میکسەری چیمەنتۆ کۆنترۆڵی لەدەستدا و خۆی بە دەیان ئۆتۆمبێلدا کێشا. لەو رووداوەدا 6 کەس گیانیان لەدەستدا (4 ئافرەت، منداڵێک و شۆفێری بارهەڵگرەکە) و 27 کەسی دیکەش بریندار بوون.

 

رۆژی 27-04-2026، نهۆمێکی باڵەخانەیەک لە کاتی کارکردندا بەسەر کرێکارەکاندا رووخا و لە ئەنجامدا کەسێک گیانی لەدەستدا و 11 کەسی دیکە بریندار بوون.