وەزارەتی خوێندنی باڵا 14 رۆژ پشووی بۆ خوێندكارانی دەرەوەی وڵات راگەیاند

 

 

وەزارەتی خوێندنی باڵا رایگەیاندووە، "بەهۆی نزیكبوونەوەی جەژنی قوربانی پیرۆز و لەبەرچاوگرتنی بارودۆخی ئەو خوێندكارانەی لە دەرەوەی وڵات دەخوێنن، بڕیار درا بە رێگەپێدان بە گەڕانەوەیان بۆ هەرێمی كوردستان بۆ رۆژانی جەژن."

 

بەگوێرەی وەزارەتەکە، "پشووی خوێندكارانی دەرەوەی وڵات لە 30ی ئەم مانگە دەستپێدەكات تاوەکو 13-06-2025؛ كە دەكاتە 14 رۆژ."

 

عەباس ئەکرەم، گوتەبێژی وەزارەتی خوێندنی باڵا بە رووداوی گوت، "ئەو خوێندکارانە کە لە دەرەوە دەخوێنن، نابێت تاوەکو کۆتاییهاتنی خوێندنەکەیان بگەڕێنەوە، بەجۆرێک ئەگەر بۆ بەدەستهێنانی ماستەر بێت 9 مانگ و ئەگەریش بۆ بڕوانامەی دکتۆرا بێت 18 مانگ ناتوانن بگەڕێنەوە وڵات، بەڵام ئەم 14 رۆژەی پشوو بە مانەوە لە دەرەوە بۆیان هەژمار دەکەین."

 

دوێنێ حكومەتی سعودیە رایگەیاند، رۆژی 06-06-2025 یەكەم رۆژی جەژنی قوربانە.