کۆنسووڵی ئەرمینیا: رووداو میدیایەکی کوالێتیی بەرزە و رۆڵی گرنگی لە گەشەپێدانی ناوچەکە هەیە

 

رۆژی پێنجشەممە، 29-05-2025، 12ـەمین ساڵیادی دامەزراندنی تۆڕی میدیایی رووداوە،

 

رافایل مۆڤسێسیان، کۆنسووڵی ئەرمینیا لە پەیامێکدا بۆ رووداو رایگەیاند: "پێش هەموو شتێک دەمەوێت بڵێم، من رووداو وەک میدیایەکی کوالێتیی بەرز هەڵدەسەنگێنم، پێموایە میدیایەکی لەمجۆرە رۆڵێکی زۆر گرنگ لە گەشەپێدانی ناوچەکە دەگێڕێت."

 

مۆڤسێسیان ئاماژەی بە هاوکاریی نێوان رووداو و کۆنسووڵخانەی گشتیی ئەرمینیا لە هەولێر کرد و گوتی: "ئاگاداری ئەو هاوکارییەین کە لەنێوان رووداو و کۆنسووڵخانەی گشتیی ئەرمینیا لە هەولێر هەیە. هەموو کۆنسووڵەکانی پێشوو لەگەڵ رووداو پەیوەندییان هەبووە."

 

وەک نموونەیەک لە هاوکارییەکان، کۆنسووڵی ئەرمینیا باسی بەڵگەفیلمی "مستەفا پاشا یامولکی" کرد و رایگەیاند: "ئەو بەڵگەفیلمە، کە باسی ژیانی ئەفسەرێکی کورد دەکات لە سەردەمی عوسمانییەکان لە 1919 و 1920 کە خەباتی بۆ دادپەروەری دەکرد، لەلایەن رووداوەوە و بە هاوئاهەنگییەکی نزیکی کۆنسووڵخانە بەرهەمهێنرا."

 

لە کۆتایی پەیامەکەیدا، رافایل مۆڤسێسیان هیوای خواست "هاوئاهەنگی و هاوکاریی زیاتر لەگەڵ رووداودا بکەن" و گوتیشی: "دەمەوێت ئەو دەرفەتە بقۆزمەوە و بەبۆنەی 12ـەم ساڵیادەوە، پیرۆزبایی لە رووداو بکەم. هیوای باشترین بەختتان بۆ دەخوازم."