دادگاییکردنی شاسوار عەبدولواحید جارێکی دیکە دواخرا

 

شاسوار عەبدولواحید، رۆژی 12ـی ئەم مانگە کاژێر 10:00ـی شەو بە بڕیاری دادوەر دەستگیرکرا، رۆژی 21ـی ئاب بردرایە بەردەم دادوەر، بەڵام دانیشتنەکە بۆ ئەمڕۆ دواخرا.

 

رۆژی پێنجشەممە، 28ـی ئابی 2025، بەرپرسێکی باڵای جووڵانەوەی نەوەی نوێ بە تۆڕی میدیایی رووداوی راگەیاند: "ئەمڕۆ بۆ دووەمجار دادگاییکردنی کاک شاسوار بەڕێوەچوو، شەش کەس ئامادەبوون و لە بەرژەوەندیی کاک شاسوار شایەتییان دا، دوای نزیکەی سێ کاژێر دانیشتنەکە بۆ 2ـی ئەیلوول دواخرا."

 

بە گوتەی ئەو بەرپرسە، "گوایە هۆکاری دواخستنی دانیشتنەکە ئەوەیە کە دادوەر لە یەک رۆژدا ناتوانێت هەم شایەت وەربگرێت و هەمیش بڕیار بدات، بۆیە دانیشتنەکەیان دواخستووە."

 

دەستگیرکردنی سەرۆکی نەوەی نوێ لەسەر سکاڵایەکی شادی نەوزاد، پەرلەمانتاری پێشووی نەوەی نوێ بووە، کە لە ساڵی 2019 تۆماریکردووە. پارێزەری سکاڵاکار رایگەیاندووە، بە سزای شەش مانگ بەندکردن رازین.