لە ئیلام سێ ئەندامی یەک خێزان کوژران

بەهزاد بەستامی، بەڕێوەبەری پۆلیسی شاری ئیلامی رۆژهەڵاتی کوردستان رایگەیاند، شەممە، 27-09-2025، کەسێکی تەمەن 40 ساڵانی خەڵکی شارەکە، بەهۆی کێشەیەکی خێزانیی تایبەت بە میراتەوە، بە چەکی راو تەقەی لە ماڵی مامی کردووە.

 

بەگوتەی بەهزاد بەستامی، لە رووداوەکەدا مام، ئامۆژن و ئامۆزایەکی بکوژ، دەستبەجێ گیانیان لەدەستداوە. دوو کەسی دیکەش کە دەگوترێت دراوسێی کوژراوەکان بوون، لەکاتی نێوبژیوانیدا گولـلەیان بەرکەوتووە و بریندار بوون. 

 

بەڕێوەبەری پۆلیسی ئیلام ئاماژەی بەوەش کرد، برینداران گەیێندراونەتە نەخۆشخانە و ئێستا لەژێر چاودێریدان.

 

دوای تەقەکردن، بکوژ هەڵاتووە. وەک بەهزاد بەستامی دەڵێت، تاوەکو ئێستا دەستگیرنەکراوە و گەڕان بەدوایدا بەردەوامە.

 

لە ئێران زانیاریی ورد لەبارەی کوشتن بە چەک بەردەست نییە، بەڵام بەگوێرەی ئامارەکانی دادپزیشکیی وڵاتەکە، لە 21-03-2024ـوە تاوەکو 21-03-2025، 581 هەزار و 941 کەس بەهۆی شەڕ، برینداربوون یان کوژرانی کەسوکاریان، سەردانی دادپزیشکییان کردووە.