مەسرور بارزانی: بۆ چارەسەرکردنی ئیسماعیل بێشکچی ئامادەی هەموو هاوکارییەکین

 

 

ئەمڕۆ یەکشەممە 28ی ئەیلوولی 2025 مەسرور بارزانی، سەرۆکی حکومەتی هەرێمی کوردستان لە پەیوەندییەکی تەلەفۆنیدا لەگەڵ وەقفی ئیسماعیل بێشکچی، لە رەوشی تەندروستیی نووسەر و کۆمەڵناسی ناسراوی تورک و دۆستی دێرینی گەلی کورد د. ئیسماعیل بێشکچی پرسی، کە ئێستا لە نەخۆشخانەیە.

 

سەرۆکی حکومەتی هەرێمی کوردستان هیوای زوو چاکبوونەوەی بۆ د. بێشکچی خواست و ئامادەیی تەواوی حکومەتی هەرێمی کوردستانی بۆ پێشکێشکردنی هەموو جۆرە هاوکاری و یارمەتییەک بۆ چارەسەرکردنی دەربڕی.

 

شەوی رابردوو 27ی ئەیلوولی 2025 ئیسماعیل بێشکچی، کۆمەڵناس و نووسەری ناسراوی تورک، لەکاتی پێشکێشکردنی گوتارێک لە 9یەمین فێستیڤاڵی بەڵگەفیلمی "فیلم ئامەد"، تەندروستیی تێکچوو و گەیێندرایە نەخۆشخانەی زانکۆی دیجلە.

 

دوای گەیشتنی تیمی فریاکەوتنی 112 بۆ هۆڵی فێستیڤاڵەکە و پێشکەشکردنی چارەسەری سەرەتایی، بێشکچی بۆ پشکنینی وردتر و وەرگرتنی چارەسەر، رەوانەی نەخۆشخانەی فاکەڵتیی پزیشکیی زانکۆی دیجلە کرا.