دەستەی وەبەرهێنان: میسر لە بواری کشتوکاڵدا هاوکاریی هەرێمی کوردستان دەکات

 

 

ئەمڕۆ سێشەممە 28-11-2023، دەستەی وەبەرهێنانی هەرێمی کوردستان لە راگەیێندراوێكدا بڵاویکردەوە، د. محەممەد شوکری، سەرۆکی دەستەی وەبەرهێنانی هەرێمی کوردستان لەگەڵ ژمارەیەک لە وەبەرهێنەر و خاوەنکارانی میسر کۆبووەتەوە. بەگوێرەی راگەیێندراوەکە، "لە کۆبوونەوەکەدا جەخت لە فراوانکردنی ئاڵوگۆڕی بازرگانی لەنێوان هەرێمی کوردستان و میسر کراوەتەوە".

 

بەرگەشت ئاکرەیی، گوتەبێژی دەستەی وەبەرهێنانی هەرێمی کوردستان رۆژی سێشەممە 28-11-2023 بە تۆڕی میدیایی رووداوی گوت، "میسر وڵاتێکی گەورەیە لە بواری کشتوکاڵدا. ئێمە دەمانەوێت هەرێمی کوردستان سوود لە ئەزموونی ئەو وڵاتە وەربگرێت، بەتایبەت لەوێ زەوییەکان پۆلێن دەکرێن و هیچ وەرزێک بە بەتاڵی ناهێڵدرێنەوە و بە بەروبوومی جیا دەچێندرێن".

 

بەرگەشت ئاکرەیی گوتی، شاندی میسر بەڵێنیاندا، بە پسپۆڕ و وەبەرهێنی خۆیان لە بواری کشتوکاڵدا هاوکاریی هەرێمی کوردستان بکەن.

 

بەگوێرەی راگەیێندراوەکەی دەستەی وەبەرهێنان، "شاندی میسر ئامادەییان پیشانداوە بەشداریی پڕۆژەی وەبەرهێنان بکەن و هانی وەبەرهێنەرەکانیشیان بدەن سەردانی هەرێمی کوردستان بکەن و بەدیاریکراوی لە کەرتی کشتوکاڵدا وەبەرهێنان بکەن".

 

لە راگەیێندراوەکەدا ئاماژە بەوەکراوە، سەرۆکی دەستەی وەبەرهێنانی هەرێمی کوردستان ئامادەیی خۆی و دامەزراوەکانی حکومەتی هەرێمی کوردستان پیشانداوە کە لە چوارچێوەی یاسا کارپێکراوەکانی وەبەرهێناندا هاوکاری و ئاسانکاری لە ئەنجامدانی پڕۆژەی وەبەرهێنەرانی میسری لە هەرێمی کوردستان بکەن.