بەفر رێگەی 1028 گوند و ئاوایی لە باکووری کوردستان داخستووە
رووداو دیجیتاڵ
شەپۆلێکی بەفربارین زۆربەی پارێزگاکانی باکووری کوردستانی گرتووەتەوە، بووەتە هۆی داخستنی رێگەی هەزار و 28 گوند و کێڵگە و ئاوایی لە پارێزگاکانی وان، جۆلەمێرگ، بەدلیس و مووش.
سەرۆکایەتیی گەورەشارەوانیی وان لە راگەیێندراوێکدا بڵاویکردەوە، بەهۆی خراپیی کەشوهەوا لە ئەنجامی بەفربارینی چڕ و بەردەوامی دوو رۆژی رابردوودا، رێگەی 345 گوند و کێڵگە لە بەرزاییەکانی شارۆچکەکانی شاخ، ئێلباک و وێستان بەڕووی هاتووچۆ داخراون.
هاوکات، شارەوانیی جۆلەمێرگ رایگەیاند، بەهۆی بەفربارین رێگەی 176 گوند بەتەواوەتی داخراون و لە پاڵ هەوڵی کردنەوەی رێگەکان، پرۆسەی رشاندنی خوێ لەسەر رێگە سەرەکییەکاندا بەردەوامن.
هەرچی پارێزگای بەدلیسە، شارەوانیی ئەم پارێزگایە ئاشکرای دەکات کە لە دوو رۆژی رابردوودا رێگەی 282 گوند و کێڵگە و ئاوایی بەهۆی زۆریی رێژەی بەفربارینەوە بەڕووی هاتووچۆدا داخراون.
لە پارێزگای مووش، هاوشێوەی پارێزگاکانی دیکە 225 گوند و کێڵگە رێگەکانیان بە بەفر داخراون. لە بەیانییەوە تیمەکان رێگەی 44 گوندیان کردووەتەوە، بەڵام خراپیی کەشوهەوا کارەکانیان سەختتر دەکات و لە ئەگەری بەردەوامیی بەفرباریندا رێگەکان دووبارە دابخرێنەوە.
بەڕێوەبەرایەتیی گشتیی کەشناسیی تورکیا پێشبینی دەکات، شەپۆلی بەفربارین لە دیوی رۆژهەڵاتی پارێزگاکانی باکووری کوردستاندا تاوەکو ئێوارەی رۆژی سێشەممە، 31ـی مانگ بەردەوام بێت.