داعش کاتی بەربانگ لە کەرکووک سەربازێکی سوپای عێراق دەکوژێت

 

 

بەگوێرەی زانیارییەکان، داعش هێرشیکردووەتە سەر فەوجی یەکەی لیوای 44ی سوپای عێراق لە سنووری دۆڵی شای لەنێوان کەرکووک - تکریت.

 

سەربازێکی سوپای عێراق لە فەوجی یەکەی لیوای 44 بە رووداوی راگەیاند، "یەک سەربازمان بە قەناس شەهید کراوە و بریندارمان نییە، ئەگەرچی هاوڕێکانم بەرپەرچیان داونەتەوە، بەڵام زیان بەر داعش نەکەوتووە و هەڵاتوون".

 

ئەو سەربازە لە ئەرکدا نەبوو و لە ماڵەوە پەیوەندی بە رووداو کرد و لە زاری هاوڕێکانیەوە زانیارییەکانی گەیاند.

 

ناوچەی دۆڵی شای، دەکەوێتە سنووری قەزای داقووق سەر بە پارێزگەی کەرکووک.

 

هەرچەندە نزیکەی شەش ساڵە تێکشکاندنی داعش بە فەرمی راگەیێندراوە و بەردەوام هێزەکانی سوپای عێراق و پێشمەرگە کێوماڵی ناوچەکانی بۆشایی ئەمنی دەکەن، بەڵام هێشتا ناوبەناو چەکدارانی داعش لەو سنوورانە هێرش دەکەن.