پۆلیسی سلێمانی: بکوژی هاونیشتمانییەکەی سەیدسادق کوڕی خۆیەتی

 

24ـی تەممووز، لە نزیک گوندی تەپەڕەش لە قەزای سەیدسادق هاونیشتمانییەک کوژرا. ئەوکات پۆلیسی سلێمانی بە رووداوی گوتبوو: "کوڕی کوژراوەکە گوتوویەتی، باوکی کێشەی لەگەڵ بکوژەکاندا هەبووە".

 

سەرکەوت ئەحمەد، گوتەبێژی پۆلیسی سلێمانی ئەمڕۆ سێشەممە بە تۆڕی میدیایی رووداوی گوت: "ئەو خێزانە بۆ کاری مەڕداری چوونەتە سنوورەکە، دوای لێکۆڵینەوە دەرکەوت بکوژی پیاوەکە کوڕەکەی خۆی بووە".

 

گوتەبێژی پۆلیسی سلێمانی دەڵێت: "کوڕەکە لەگەڵ باوکی کێشە و دەمەقاڵێیان هەبووە و دواتر ئەو رووداوەی لێکەوتووەتەوە".

 

هەر ئەمڕۆ پۆلیسی سلێمانی رایگەیاند: "دوای رووداوەکە توانرا دوو كەس بەتۆمەتی ئەنجامدانی تاوانەكە دەستگیربكرێن، لێكۆڵینەوەكانی پۆلیس بەردەوام بوو و بەڵگەی پێویست كۆكرایەوە تاوەکو گەیشتە ئەو ئەنجامەی یەكێك لە تۆمەتبارە دەستگیركراوەكان کە تاوانەكەی کردووە، کوڕی تاوانلێکراوەکەیە".

 

ئەو کەسەی دەستگیرکراوە ناوی (ك، ب، ق)ە و لە دایكبووی 2001ە، بە بڕیاری دادوەر راگیراوە.