سەرۆكی لیژنەی پەروەردە لە‏‏ پەرلەمان: مانگی داهاتوو پرۆسەی خوێندن ‏دەستپێناكاتەوە

‏

عەبدولسەلام دۆڵەمەڕی، سەرۆكی لیژنەی پەروەردە و ‏خوێندنی باڵا لە ‏‏‏پەرلەمانی كوردستان بە تۆڕی میدیایی رووداوی راگەیاند، بەپێی ‏بەدواداچوونەكانیان لە مانگی ئەیلوول پرۆسەی خوێندن ‏دەستپێناكات، دەشڵێت "ئامادەكاریی باش بۆ دەستپێكردنەوەی ‏پرۆسەی خوێندن نەكراوە، جگە لەوە هێشتا بەشێك لە بەشە ناوخۆییەكان ‏وەك نەخۆشخانە‏ بەكاردەهێندرێن".‏

 

سەرۆكی لیژنەی پەروەردە و ‏خوێندنی باڵا لە ‏‏پەرلەمانی كوردستان باس ‏لەوەش دەكات، بۆ خوێندنی قۆناخەكانی بنەڕەتی ‌و ئامادەیی باشترین ‏چارەسەر، كردنی پۆلەكانە بە دوو گرووپ هەر گرووپەش سێ‌ رۆژ دەوام ‏بكات، بۆ زانكۆ ‌و پەیمانگەكانیش سیستەمی ئاوێتە بە گونجاو دەزانێ ‌‌و ‏دەڵێت "ئەو سیستەمە تێكەڵەیەكە، بەو جۆرەی بەشێك لەوانەكان بە ‏ئەلیكترۆنی دەخوێندرێن‌ ‌و تاقیكردنەوەكان ‌و بەشێك لەوانە ‏پراكتییەكانیش لەناو زانكۆ ‌و پەیمانگەكان".

 

بە گوتەی عەبدولسەلام دۆڵەمەڕی، ئێستا عێراقیش بڕیاریداوە بەو جۆرە خوێندنی ‏زانكۆ ‌و پەیمانگەكان لە 6-12 دەستپێبكات.‏

 

ئەمە لەکاتێکدایە ئەمڕۆ ئەنجوومەنی وەزارەتی خوێندنی باڵا ‌و توێژینەوەی زانستی هەرێمی ‏كوردستان بۆ چۆنیەتی دەستپێكردنی دەوام لە ساڵی نوێی خوێندن ‏كۆدەبێتەوە، سەبارەت بە وەزارەتی پەروەردەش هێشتا دیار نییە كەی ‏ئەوە یەكلای دەكاتەوە و ساڵی نوێی خوێندنی 2020 بۆ 2021 كەی ‏دەستپێدەكاتەوە.‏