ئیمپایەر تاوەرز لەبارەی کێشەی ئاسانسوارەکانی پرۆژەکە: هەموویان دەگۆڕدرێن

 

پەری ئەحمەد، هاونیشتمانییەکی دانیشتووی پرۆژەی ئیمپایەر تاوەرزە لە سلێمانی، بە رادیۆی رووداوی گوت، پرۆژەی ئیمپایەر تاوەرز دوو تاوەری 35 نهۆمییە و هەر تاوەری سێ ئاسانسواری تێدایە، بەڵام ئێستا لەو تاوەری ئێمە تێیدا دەژین، تەنیا یەک ئاسانسواری کار دەکات و بەردەوام ئەویش کێشەی هەیە.

 

بەگوتە ئەو هاونیشتمانییە، چەندین جار دانیشتووانی پرۆژەکە سکاڵا و گلەیی خۆیان گەیاندووەتە بەشی خزمەتگوزاری پرۆژەکە، بەڵام کێشەکە هەر بەردەوامە و رۆژانە لەو باڵەخانە بەرزە کە 33 نهۆمە و هەر نهۆمی 5 شووقەی تێدایە واتا نزیکەی 165 شووقە چۆن دەتوانن تەنیا یەک ئاسانسوار بەکاربهێنن، کە لۆدێکی زۆری لەسەرە.

 

پەری باسی لەوەشکرد، ئەوان مانگانە 60 هەزار دینار وەکو پارەی خزمەتگوزاری[سکیوریتی، ئاسانسوار و ئاو] دەدەنە بەشی خزمەتگوزاری پرۆژەکە، کەچی دۆخی خزمەتگوزارییان بەو جۆرەیە و داواکارن لە لایەنی پەیوەندیدار کێشەکەیان بۆ چارەسەر بکرێت، چونکە لەناکاو ئاسانسوارەکان دەکوژێنەوە و مەترسیین بۆسەر ژیانمان.

 

ئەو هاونیشتمانییە دەشڵێت، "هەندێ جار ئاسانسوارەکان دەکوژێنەوە و کێشەیان هەیە، لە نهۆمێکەوە فڕێمان دەداتە نهۆمێکی دیکە، رۆژانە ئەم کێشەیە دووبارە دەبێتەوە."

 

زۆراب عەلی، لێپرسراوی بەشی خزمەتگوزاری لە ئیمپایەر تاوەرز لە سلێمانی  بە رادیۆی رووداوی گوت، ئێمە 5 بۆ 6 مانگە خزمەتگوزاری ئەم پرۆژەیەمان وەرگرتووە، بەگوێرەی گرێبەست دەبوو لە سێ مانگدا ئاسانسوارەکان بگۆڕدرێت، ئێستا هاوردەکراون و لە رێگەن.

 

لێپرسراوی بەشی خزمەتگوزاری لە ئیمپایەر تاوەرز لە سلێمانی  گوتیشی، هەر 6 ئاسانسوارەکە دەگۆڕدرێن، ئێستا کە کۆمپانیای تایبەتمەند بەو کارە هاوردەی کردوون و لە بەندەری بەسرەیە، چاوەڕیی گەیشتنیانین، چونکە لە 24 و 25ـی ئەیلوول گەیشتوونەتە بەسرە، لە ماوەی 15رۆژ دەگاتە سلێمانی، گۆڕینی هەر ئاسانسوارێکیش بەگوێرەی کۆمپانیاکە 10 رۆژی پێویستە.

 

لەبارەی کوژانەوە و کەوتنی ئاسانسوارەکان، زۆراب عەلی گوتی، "ئاسانسوارەکان کێشەی کوژانەوەیان نییە بەو جۆرەی باس دەکرێت، ئەگەر بکوژێتەوە لە نهۆمی خۆی یان نزیکترن نهۆم دەوەستێت، هەروەها ئەوە دەڵێن بەردەبێتەوە، شتی وا نییە."