مەسرور بارزانی: لەگەڵ دانە گاز رێککەوتووین بۆ گەڕاندنەوەی کارەبا لە چەند کاژێری داهاتوو دا

 

مەسرور بارزانی، سەرۆکوەزیرانی هەرێمی کوردستان رۆژی شەممە، 29-11-2025 رایگەیاند، هێرشەکە نابێت "بەبێ لێپرسینەوە تێپەڕێت و نابێت هێرشەکان ببنە رووداوی ئاسایی".

 

سەرۆکوەزیرانی هەرێمی کوردستان گوتیشی، "دیار بوو دووژمن و ناحەزان و بەکرێگیراوەکانیان چاویان بە پێشکەوتنی کوردستان و ئاسوودەبوونی خەڵک هەڵنایەت و بە شێوەیەکی ترسنۆکانە و نامەردانە، ئەم هێرشەیان کرد و دژی رووناکی وەستانەوە و هەوڵیان دا تاریکی بگەڕێننەوە".

 

سەرۆکوەزیرانی هەرێمی کوردستان دەڵێت، کۆمپانیای دانە گازی دڵنیاکردووەتەوە لەوەی، لەگەڵ حکومەتی عێراق "هەموو هەوڵێک دەدەین بۆ کۆتاییهێنان بە هێرشە تیرۆریستییەکان و بەسزاگەیاندنی ئەنجامدەرانی هێرشەکە و رێگەگرتن لە دووبارەبوونەوەی لە داهاتوودا".

 

مەسرور بارزانی دەشڵێت، لە هەمان کاتدا لەگەڵ هاوبەشە نێودەوڵەتییەکان کار دەکەن بۆ دابینکردنی "پێداویستییەکانی پاراستنی گەلەکەمان و ژێرخانی ئابووری و وەبەرهێنانمان".

 

مەسرور بارزانی و محەممەد شیاع سوودانی، 27ـی ئەم مانگە بە تەلەفۆن باسیان لە هێرشەکەی سەر کۆرمۆر کرد. 

 

سەرۆکوەزیرانی هەرێمی کوردستان دەڵێت، لەگەڵ سوودانی "باسمان کردووە کە دەبێت ئەنجامدەرانی ئەم هێرشە هەر لایەن و گرووپێک بن و لە هەر کوێ بن لێپرسینەوەیان لەگەڵدا بکرێت و رادەستی یاسا بکرێن".

 

کێڵگەی کۆرمۆر دەکەوێتە سنووری قەزای چەمچەماڵی سەر بە پارێزگای سلێمانی، شەوی 26ـی ئەم مانگە هێرشی کرایە سەر و بەرهەمهێنانی گاز وەستا. 

 

وەزارەتەکانی ناوخۆی هەرێمی کوردستان و عێراق لیژنەیەکی هاوبەشیان بۆ لێکۆڵینەوە لە هێرشەکە پێکهێناوە و چاوەڕوان دەکرێت لە ماوەی 72 کاژێردا ئەنجامە سەرەتاییەکان رابگەیێنن. هیچ گرووپێک بەرپرسیارێتیی هێرشەکەی لە ئەستۆ نەگرتووە.

 

لە ساڵانی رابردوودا دەیان جار ژێرخانی نەوت و گازی هەرێمی کوردستان کراوەتە ئامانج؛ بەرپرسانی کورد هێرشەکان دەخەنە ئەستۆی گرووپە چەکدارەکانی دەرەوەی کۆنترۆڵی حکومەتی فیدراڵی.