لە دووبز گەنجێکی کورد بە دووکەڵی زۆپا گیانی لەدەستدا

 

سەرچاوەیەک لە پۆلیسی دووبز بە تۆڕی میدیایی رووداوی راگەیاند "عومەر کەریم نای ئەو کەسەیە کە گیانی لەدەستداوە، دوای ئاگادارکردنەوەیان چوونەتە شوێنی رووداوەکە و پەڕاوی لێکۆڵینەوەیان کردووەتەوە و تەرمەکەیان رەوانەی دادپزیشکی کردووە."

 

محەممەد قادر هاوڕێی عومەر بە رووداوی راگەیاند "شەو بەهۆی سەرماوە دوو زۆپای بردووەتە ژوورەوە و تا نیوەڕۆ ئاگادارنەبوونە لەگیانلەدەستدانی، کاتێک دەرگای ژوورەکەیان کردووەتە بینیویانە دووکەڵێکی زۆر لەژوورەیە و عومەر گیانی لەدەستداوە."

 

ئەو هاوڕێیەی لە بەشێکی دیکەی قسەکانیدا دەڵێت، عومەری هاوڕێی لەگەڵ کەسوکاری کارگەی بلۆکییان هەیە و هەر لەوێ کاری کردووە.

 

رۆژی پێنجشەممە 23ی کانوونی یەکەمی 2021 دایکێک و چوار منداڵی بەهۆی دووکەڵی خەڵووز لە گوندی (قوپک) لە قەزای ئاکرێ خنکان.

 

هەروەها رۆژی 26ی ئەم مانگە کرێکارێکی عەرەبی سووریا بەهۆی هەڵمژینی غازی خەڵووز گیانی لەدەستدا.