حکومەت: هیچ بارەگا و بنکەیەکی ئیسرائیل لە هەرێمی کوردستان نییە

 

 

حکومەتی هەرێمی کوردستان ئەمڕۆ هەینی، 29-12-2023، ئەوەی لە بەرامبەر هەواڵێکی گرووپە چەکدارەکان راگەیاندووە کە بە "هێزی لە یاسا دەرچوو" ناوی بردوون.

 

لە راگەیێندراوەکەی حکومەتی هەرێمی کوردستاندا هاتووە، "هێزێکی لە یاسا دەرچوو رایگەیاندووە، لە رێگەی درۆنەوە بارەگایەکی ئیسرائیلیان لەهەولێر بۆردومانکردووە. ئەم هەواڵانەی ئەم گرووپ و هێزە نایاساییانە بێ بنەمان و دوورن لە راستییەوە و هیچ بارەگا و بنکەیەکی ئیسرائیل لەهەرێمدا بوونی نییە، بە ئامانجگرتنی هەولێر هەر جارەی بە بیانوویەک تەنیا سەرلێشێواویی ئەم گرووپانە دەردەخات و کارێکی ترسنۆکانە و تیرۆریستییە".

 

بەگوێرەی وەزارەتی بەرگریی ئەمریکا، لەدوای جەنگی نێوان ئیسرائیل و چەکدارانی حەماس، گرووپە چەکدارەکانی نزیک لە ئێران لە 17ـی تشرینی یەکەمەوە، زیاتر لە 100 جار هێرشیان کردووەتە سەر هێزەکانی ئەمریکا لە عێراق و سووریا.

 

ئەو گرووپانە هەر جارە و بیانوویەک بۆ هێرشەکانیان دەهێننەوە، وەکو هەبوونی بنکە و بارەگای هێزی ئەمریکی و ئیسرائیلی، بەڵام حکومەتی هەرێمی کوردستان لە راگەیێندراوەکەیدا هەبوونی بنکە و بارەگای ئیسرائیلی لە هەرێمی کوردستان رەتدەکاتەوە.