بانکێکی ئەڵمانیا وەکو سیناریۆی فیلمی Money Heist بڕدرا

 

 

دزەکان بە سمەک (دڕێل)ێکی تایبەت و دەگمەن لە ژێرزەمینەوە کۆنکرێتیان کون کردووە، کە دەگەیشتە ناو ژووری قاسەکان و دوای پڕکردنی کیسەکانیان لە پارە، هەڵاتوون.

 

رۆژی دووشەممە، پۆلیسی شاری گێلزنکیرشن بە تۆڕی میدیایی رووداوی راگەیاند، "دزەکان سوودیان لە پشووی کریسمس و داخستنی بانک وەرگرتووە و بە سمەک ئەو دیوارەیان کون کردووە کە دەچێتەوە سەر ژووری قاسەکان."

 

دەشڵێت: "دزەکان پلانێکی تۆکمەیان داناوە و لەکاتی بەکارهێنانی سمەکەکەدا، ئاویان بەکارهێناوە بۆ ئەوەی بڵاوبوونەوەی تۆز و خۆڵ نەبێتە هۆی لێدانی زەنگی ئاگادارکردنەوە."

 

بانکەکە لقێکی شپارکاسەیە و یەکێکە لە بانکە بەناوبانگەکانی ئەڵمانیا. 

 

تۆماس نۆڤاسیک، گوتەبێژی پۆلیسی شارەکە، بە رووداوی راگەیاند، "تاوەکو ئێستا دیار نییە چەند پارە لە بانکەکە دزراوە و تاوانبارانیش هەڵاتوون. پۆلیس داوای هاوکاریی لە خەڵک کردووە ئەگەر شتێکیان بینیوە، زانیارییان پێبدەن بۆ ئەوەی دزەکان بدۆزرێنەوە."

 

لە وێنەکاندا دەردەکەوێت، دزەکان لە ژێرزەمینەوە چوونەتە نێو بانکەکە و لەوێوە بە سمەک کۆنکرێتی دیوارەکەیان کونکردووە تاوەکو گەیشتوونەتە سەر ژووری قاسەکان.

 

شێوازی بەکارهێنانی دڕێڵەکە و کونکردنی دیوارەکان و خەزێنەی بانکەکە، نزیکە لە چیرۆکی زنجیرە فیلمی نێتفلێکس Money Heist کە بە هەمان شێواز بانک دەبڕن.