دەوڵەت باخچەلی دەڵێ، هیچ هێرشێک نابێتە هۆی پاشەکشەی تورکیا لە پرۆسەی چارەسەری
رووداو دیجیتاڵ
سەرۆکی پارتی بزووتنەوەی نەتەوەیی تورکیا (مەهەپە) لە هەژماری خۆی لە تۆڕی کۆمەڵایەتیی ئێکس روونکردنەوەیەکی لەبارەی ئۆپەراسیۆنەکەی ئەمڕۆی هێزە ئەمنییەکانی وڵاتەکەی لە 15 پارێزگای باکووری کوردستان و تورکیا بڵاوکردەوە.
باخچەلی رایگەیاند: "لە کاتێکدا کە ئاشتیی نێوخۆیی، ئاسایش و ئارامی بەرەو ئامانجی تورکیای بێ تیرۆر بەهێزتر دەبێت، رێکخراوی تیرۆریستیی داعش دەستی داوەتە رووداوێکی خوێناویی نوێ".
باخچەلی داعشی بە "دووژمنی هاوبەشی مرۆڤایەتی" ناوبردووە و دەڵێ، ئەو رێکخراو تووندڕۆیە "داردەستی زایۆنی-ئیمپریالیستەکانە؛" ئاماژەی بەوەشکردووە کە لە ئۆپەراسیۆنەکەی یاڵۆڤادا سێ پۆلیس کوژراون، هەشت پۆلیس و پاسەوانێکیش بریندار بوون.
باخچەلی دەڵێ، هیچ هێرشێک ناتوانێ ویستی تورکیا بۆ سەرکەوتن لە پرۆسەی چارەسەری لاوازبکات و ئاماژەی بەوەشکرد، ئەوەی داعش کردی ئەوەی دەرخست کە پڕۆسەی چارەسەری هەنگاوێکی سیاسیی دروست و مێژووییە.
بەرەبەیانیی رۆژی دووشەممە هێزە ئەمنییەکانی تورکیا لە ئۆپەراسیۆنێکی هاوکاتدا هەڵیانکوتایە سەر 108 شوێن لە 15 پارێزگای تورکیا و باکووری کوردستان کە گومانی بوونی ئەندامانی داعشیان لێ دەکرا.
یەکێک لەو شوێنانەی ئۆپەراسیۆنەکەی لێ بەڕێوەچوو، پارێزگای یاڵۆڤا بوو. لەو شارەدا پێکدادان لە نێوان پۆلیس و ئەو گرووپەدا روویدا کە گومانی ئەندامیەتیی داعشیان لێ دەکرا و تێیدا سێ پۆلیس کوژران، هەشت پۆلیس و پاسەوان بریندار بوون؛ هاوکات شەش گومانلێکراوی داعش کوژران.