باشووری کوردستان یەکدەنگ بۆ رۆژئاوای کوردستان؛ سەدان هەزار هاونیشتمانی رژانە سەر شەقامەکان

 

هاونیشتمانییانی کەرکووکیش لە هاونیشتمانییانی هەرێمی کوردستان دانەبڕان. سەدان هاونیشتمانی لەسەر شەقام بە پیادەڕەوی و بە گوتنەوەی سروودی ئەی رەقیبەوە پاڵپشتی خۆیان بۆ کوردستانییانی رۆژئاوای کوردستان دەربڕی. خۆپێشاندەرێک بە هەردی محەممەد، پەیامنێری رووداوی راگەیاند، "بە هەموو توانامانەوە لە پشت براکانمان لە رۆژئاوای کوردستان دەبین."

 

 

لە شاری دهۆکیش، لەو کەشە ساردەدا هاونیشتمانییان رژانە سەر شەقام. هاونیشتمانییەکی بەشداربوو بە نایف رەمەزان، پەیامنێری رووداوی گوت، "ئێمە لێرەین بۆ ئەوەی بۆ هەموو جیهان بسەلمێنین یەک پارچەین و دانەبڕاوین." 

 

ئیدارەی سەربەخۆی سۆرانیش بەشێک بوو لە زنجیرە خۆپێشاندانەکە و هاونیشتمانییەک بە ئەندام جەبار، پەیامنێری رووداوی گوت، "پێویستە هەموومان یەکڕیزی ماڵی کورد بهێنینە دی."

 

لە قەزای کەلار لە پارێزگای سلێمانی، سۆزان مەنسوور، ئەندامی خولی پێشووی پەرلەمانی عێراق لە نێو خۆپێشاندانەکانەوە بە هونەر حەمید، پەیامنێری رووداوی راگەیاند، "ئەم ناخۆشییەی رۆژئاوای کوردستان لەلایەکەوە بووە مایەی دڵخۆشی، چونکە هەموو کوردستانییانی یەکخست؛" گوتیشی: "پێشتر خەممان دەخوارد کە منداڵەکانمان واتای کوردبوون نازانن، بەڵام ئەمڕۆ بگرە بوونەتە پێشڕەو."

 

 

هاوشێوەی شارەکانی دیکە، لە قەزای سەیدسادقیش هاونیشتمانییان بە فراوانی رژانە سەر شەقامەکان. 

 

ئەدەهم حەمەڕەشید، دانیشتووی قەزاکە بە سازگار سەڵاح، پەیامنێری رووداوی گوت، "نەوەی ئێستا جێگەی ئومێدن کە رێبازی قازی محەممەد و شێخ سەعیدی پیران و سەرکردەکانی دیکەی کورد دەگرنەبەر."