زیندانییەک لە نەخۆشخانەیەکی دهۆک 'دەچێتە ئاودەست' و هەڵدێت؛ 'بە تاوانی کوشتن سزا دراوە'

 

 

ئەمڕۆ چوارشەممە 30ی نیسانی 2025 حەیدەر دۆسکی، پەیامنێری رووداو لە بووڵتەنی کاژێر 13:00دا گوتی، "ئەو زیندانییە لە نەخۆشخانەی ئازادی هەڵاتووە، نەوەک لە چاکسازیی زرکا، وەکو ئەوەی لە هەندێک شوێن باس دەکرێت. زیندانییەکە بە تاوانی کوشتن سزادرابوو و لە چاکسازیی زرکای شاری دهۆک ماوەی سزاکەی بەسەردەبرد."

 

بە گوتەی پەیامنێری رووداو، ئەو زیندانییە دوو ساڵی لە زیندان مابوو بۆ تەواوکردنی سزاکەی؛ هاوکات نەخۆشییەکی درێژخایەنی هەیە و زۆرجار لە زیندانەوە دەبرایە نەخۆشخانە.

 

پەیامنێری رووداو گوتی، زیندانەکە ئەوەی بە هەل زانیوە و هەڵاتووە.

 

بەپێی زانیارییەکانی رووداو، "زیندانییەکە گەنجە و بە تاوانی کوشتنی ژنێک سزادرابوو. ئەو کەسە لە نەخۆشخانەی ئازادی داوای چوونە ئاودەستی کردووە. پۆلیس کەلەپچەی دەستی کردووەتەوە و ئەویش لە پەنجەرەی ئاودەستەکەوە هەڵاتووە. گەنجەکە خەڵکی سنووری قەزای شێخانە."

 

حەیدەر دۆسکی گوتیشی، "شوێنەکە کامێرای چاودێریی لێیە و هەوڵ دەدرێت لە رێگەی کامێرای چاودێرییەوە بدۆزرێتەوە."