لە رووداوێکی هاتووچۆدا لە باکووری کوردستان دوو کەس گیانیان لەدەستدا

 

رووداوەکە ئەمڕۆ هەینی، 30ی حوزەیرانی 2023، لە رێگەی سەرەکیی نێوان پارێزگای ئەرزینجان-سێواس روویدا و بەڕێوەبەرایەتیی هاتووچۆی ئەرزینجان، هۆکارەکەی بۆ تیژڕۆیی گەڕاندەوە. 

 

لە ئەنجامی پێکدادانی دوو ئۆتۆمبێلەکە، شۆفێر و سەرنشینی یەکێک لە ئۆتۆمبێلەکان گیانیان لەدەستدا و سێ سەرنشینیش برینداربوون. 

 

دوای ئاگادارکردنەوەی تیمەکانی تەندروستی، بریندارەکان بە ئەمبوڵانس گوێزرانەوە بۆ نزیکترین نەخۆشخانە و تەرمەکانیش رەوانەی دادی پزیشکی پارێزگاکە کران. 

 

بەهۆی پشووەکانی جەژنی قوربانەوە، رێگەوبانەکان لە تورکیا و باکووری کوردستان قەرەباڵخییەکی زۆر تێیاندا بەدی دەکرێت و ئەمەش هۆکار بووە بۆ ئەوەی رووداوی هاتووچۆی زۆر رووبدات. 

 

حکومەتی تورکیا نۆ رۆژ پشووی جەژنی قوربانی راگەیاندووە کە لە رۆژی 24ی حوزەیران دەستیپێکردووە و رۆژی 3ی تەممووز کۆتاییدێت. 

 

بەگوێرەی ئامارە فەرمییەکان، ساڵی 2022 لە باکووری کوردستان و تورکیا 485 هەزار و 48 رووداوی هاتووچۆ روویانداوە و دوو هەزار و 282 کەس گیانیان لەدەستداوە و 291 هەزار و 151 کەسی دیکەش برینداربوون.