لە کرماشان و ئیلام بەهۆی پیسبوونی هەواوە هۆشداری دەدرێت

 

 

ئەمڕۆ دووشەممە 30ی حوزەیرانی 2025، عەلی محەممەد زورئاوەند، بەڕێوەبەری کەشناسیی کرماشان رایگەیاند، "هەوای شارەکانی کرماشان، بەهۆی زۆربوونی رێژەی گەردیلە زیانبەخشەکانەوە، لە ئاستی هۆشداریدایە و بۆ خەڵکی نەخۆش، منداڵ و بەساڵاچووان مەترسیدارە".

 

عەلی محەممەد زورئاوەند گوتی: "ئەو تۆز و خۆڵەی لە درەنگی دوێنێ هاتووەتە بەرگەهەوای پارێزگاکە و بووەتە هۆی دابەزینی کوالێتی هەوا لە ناوچەکە و پێویستە ئەو کەسانەی ناچارن لە ماڵەکانیان بێنە دەرەوە، دەمامک ببەستن".

 

عەلی محەممەد زورئاوەند هۆشداری دا و گوتی، هەوای پارێزگاکە بۆ خەڵکی نەخۆش، منداڵ و بەساڵاچووان مەترسیدارە و پێویستە بۆ کاری زۆر پێویست نەبێ لە ماڵەکانیان نەیەنە دەرەوە.

 

بە گوتەی ئەو بەرپرسەی کەشناسیی کرماشان، لە شارەکانی سەرپێڵ زەهاو، قەسرشیرین، گەیەڵان، ئیسلام ئاباد و داڵاهۆ خۆڵبارینەکە چڕتر دەبێت و تاوەکو رۆژی سێشەممە بەردەوام دەبێت.

 

هەر لەم بارەوە سیروس نادری، بەڕێوەبەری کەشناسیی پارێزگای ئیلام رایگەیاند، "هەوای شارەکانی ئیلام، بەهۆی زۆربوونی رێژەی گەردیلە زیانبەخشەکانەوە، لە ئاستی هۆشداریدایە و بۆ خەڵکی نەخۆش، منداڵ و بەساڵاچووان مەترسیدارە."

 

سیروس نادری گوتی: "خۆڵبارینەکە تاوەکو رۆژی چوارشەممە بەردەوام دەبێت و بۆ منداڵ و بەساڵاچووان مەترسیدارە و پێویستە بۆ کاری زۆر پێویست نەبێت لە ماڵەکانیان نەیەنە دەرەوە."

 

بەپێی راپۆرتی وەزارەتی تەندروستیی ئێران، ساڵانە 50 هەزار کەس لەو وڵاتە بەهۆی کاریگەرییەکانی پیسبوونی هەوا گیان لەدەست دەدەن.