لە پێنج مانگدا هەناردەی دەروازەی سنووریی پەروێزخان 496 ملیۆن دۆلار بووە

 

 

ئەمڕۆ هەینی، 30-08-2024، رەزا قوربانی، بەڕێوەبەری گشتیی گومرگی دەروازەی سنووریی پەروێزخانی پارێزگای کرماشانی رۆژهەڵاتی کوردستان رایگەیاند، لە نەورۆزی ئەم ساڵەوە تاوەکو 21-08-2024، یەک ملیۆن و 50 هەزار تۆن کەلوپەل لە رێگەی دەروازەکەوە هەناردەی عێراق و هەرێمی کوردستان کراوە کە بایی 496 ملیۆن دۆلار بووە.

 

رەزا قوربانی گوتی، ئەو کاڵایانەی لە دەروازە سنوورییەکەوە هەناردە کراون بریتی بوون لە میوە و سەوزە، کەرەستەی ئاسن، بەرد، کاشی، سرامیک و کەلوپەلی بیناسازی.

 

بەگوتەی بەڕێوەبەری گشتیی گومرگی دەروازەی سنووریی پەروێزخان، لەو ماوەیەدا رۆژانە 600 بۆ 700 بارهەڵگریش کاڵا ترانزێت کراوە بۆ وڵاتانی ئیمارات، هیندستان و بەندەرەکانی باشووری ئێران کە بەهاکەیان گەیشتووەتەوە یەک ملیار و 356 ملیۆن دۆلار.

 

لە پارێزگای کرماشانی رۆژهەڵاتی کوردستان، چوار دەروازەی سنووری هەن کە سیانیان لەگەڵ هەرێمی کوردستانە و دەروازەیەکی سنووریش لەگەڵ ناوچەکانی دیکەی عێراقە.

 

دەروازە سنوورییەکانی پەروێزخان، شووشمێ و شێخ سڵە دەکەونە سنووری هەرێمی کوردستان و دەروازەی سنووریی خوسرەویش دەکەوێتە سەر سنووری نێوان کرماشان و ناوچەکانی دیکەی عێراق.