گەنجێکی خەڵکی سەقز لە بەنداوی مهاباد خنکا

رووداوەکە رۆژی هەینی، 29-08-2025، روویداوە. سەید نەسیر مەحموودی، بەڕێوەبەری ئاگرکوژێنەوەی مهاباد راگەیاند، باوک و کوڕێکی خەڵکی شاری سەقز بە مەبەستی مەلەوانی روویان لە بەنداوی مهاباد کردبوو و بەهۆی نەزانینی مەلەوانی کوڕەکە خنکاوە.

 

سەید نەسیر مەحموودی دەڵێت: "ئەو گەنجەی لە بەنداوی مهاباد دا خنکاوە ناوی کارۆ رۆستەم پوور، تەمەنی 20 ساڵ و خەڵکی شاری سەقز بوو لە پاریزگای سنە."

 

سەید نەسیر مەحموودی گوتی: "لە کاژێر سێی دوانیوەڕۆی دوێنی هەینی گەڕان بەدوای تەرمی کارۆ رۆستەم پوور بەردەوامە."

 

بەڕێوەبەری ئاگرکوژێنەوەی مهاباد ئاماژەی بەوەشکرد: "سێ تیمی غەواسی میاندوا و بۆکان و مهاباد بەدوای تەرمی کارۆدا دەگەڕێن و جگە لە تیمی مەلەوانی و غەواس، کامێرای تایبەتی ژێرئاو بەکارهێنراوە، تاوەکو ئێستا تەرمەکەی نەدۆزراوەتەوە."

 

سەید نەسیر مەحموودی گوتیشی: "تاکو کاتی دۆزینەوەی تەرمەکە گەڕانی تیمەکان بەردەوام دەبێت."

 

بەپێی ئامارێکی فەرمیی دادپزیشکیی ئێران، ساڵی رابردوو، هەزار و 26 کەس لە ئێران و رۆژهەڵاتی کوردستان بەهۆی خنکان لە ئاودا گیانیان لەدەستداوە.