ئۆپەراسیۆنی ئاسایشی هەمیشەیی گەلان لە حەسەکە: داعش پلانی بۆ هێرشکردنە سەر زیندانەکان دانابوو

 

بەگوێرەی راگەیێندراوەکە کە ئەمڕۆ شەممە، 30ـی ئابی 2025، بڵاوکراوەتەوە، لە ئۆپەراسیۆنەکەدا هێزە ئەمنییەکان هەڵیانکوتاوەتە سەر ژمارەیەک حەشارگەی شانەکانی داعش و "چەندین" تۆڕی رێکخراوەکەیان هەڵوەشاندووەتەوە.

 

لە راگەیێندراوی ئۆپەراسیۆنی (ئاسایشی هەمیشەیی گەلان) ئاماژە بەوە کراوە، "ئۆپەراسیۆنەکە هاوکاتە لەگەڵ زیادبوونی جموجۆڵەکانی داعش لە سووریا، کە سوودیان لە بۆشایی ئەمنی لە ناوچە بیابانی و دەشتاییەکانی وڵاتەکە وەرگرتووە، ئەمەش بووەتە هۆی ئەوەی شانەکانی رێکخراوەکە کۆنترۆڵی راستەقینەی ئەو ناوچانە بکەن و هەوڵبدەن بەرەو ناوچەکانی باکوور و رۆژهەڵاتی سووریا بجووڵێن، بەتایبەتی بەهۆی بوونی ئەو زیندان و کەمپانەی کە چەکدارانی تێدایە."

 

بەگوێرەی راگەیێندراوەکە، ئۆپەراسیۆنەکە وەکو هەنگاوێکی پێشوەختە بووە بۆ پووچەڵکردنەوەی هەوڵەکانی داعش بۆ خۆڕێکخستنەوە و پلاندانان بۆ هێرشکردنە سەر ئەو زیندانانەی کە چەکدار و سەرکردەکانی رێکخراوەکەی تێدایە، بەتایبەتی لە حەسەکە: "زانیارییە هەواڵگرییەکان دەریانخستبوو کە داعش هەوڵی داوە حەسەکە بکاتە ناوەندێک بۆ ئۆپەراسیۆنەکانی، بەتایبەتی لە گەڕەکەکانی نزیک زیندانی پیشەسازی، بەڵام ئۆپەراسیۆنەکە ئەو هەوڵانەی پووچەڵکردووەتەوە"

 

ئۆپەراسیۆنەکە 14 کاژێری خایاندووە و زیاتر لە سێ هەزار شەڕڤان بەشدارییان تێدا کردووە، لە راگەیێندراوەکەدا هاتووە، لە ئەنجامی ئۆپەراسیۆنەکەدا، "51 داواکراو دەستگیرکران، کە هەندێکیان لە هێرشکردنە سەر هاووڵاتییانی سڤیل و ناوەندە ئەمنی و خزمەتگوزارییەکاندا بەشداربوون، لەگەڵ هەڵوەشاندنەوەی چەندین تۆڕی مەترسیداری داعش، لەنێویاندا ئەو تۆڕانەی پلانیان بۆ هێرشکردنە سەر زیندانی پیشەسازی و کەمپی هۆل دادەڕشت."

 

بەگوێرەی راگەیێندراوەکەی ئۆپەراسیۆنی (ئاسایشی هەمیشەیی گەلان)، لە ئۆپەراسیۆنەکەدا دەست بەسەر حەشارگەیەکی چەک و تەقەمەنی و پێداویستیی لۆجیستیی شانەکانی داعشدا گیراوە، کە پێکهاتبوون لە 50 کڵاشینکۆف، 155 مەخزەنی کڵاشینکۆف، 16 دەمانچە، 16 مەخزەنی دەمانچە، 1 چەکی بی کەی سی، 5 نارنجۆکی دەستی، 3 ئامێری بێتەل، 3 چەکی بڕنەو، بڕێک فیشەکی کڵاشینکۆف و جانتا و جلوبەرگی سەربازی.

 

کەمپی هۆل دەکەوێتە پارێزگای حەسەکەی رۆژئاوای کوردستان و لەژێر دەسەڵاتی هێزەکانی سووریای دیموکرات (هەسەدە) دایە. بەشێکی زۆری نیشتەجێی کەمپەکە ژن و منداڵی چەکدارانی پێشووی داعشن.