لە نەینەوا دوو رۆژ بۆ کوردانی ئێزدی کرایە پشوو

 

رەفعەت سمۆ، یاریدەدەری پارێزگاری نەینەوا، رۆژی دووشەممە، 30-07-2023 بە تۆڕی میدیایی رووداوی راگەیاند، پاڵپشت بە نووسراوێکی دیوانی وەقفی ئاینەکانی مەسیحی و ئێزدی و سابیئە کە لە 27-07-2023 ئاراستەی پارێزگای نەینەوای کراوە، بەبۆنەی جەژنی چلەی هاوینەی کوردانی ئێزدی، نەجم جبووری پارێزگاری نەینەوا بڕیاری دا رۆژانی سێشەممە و چوارشەممە کە دەکاتە 1-2ی مانگی 8 پشووی فەرمی بێت بۆ پێکهاتەی کوردانی ئێزدی لەسەرجەم فەرمانگەکانی نەینەوا.

 

لە رووی دابەشبوونی جوگرافیای دانیشتووانەوە، کوردانی ئێزدی زیاتر دەکەونە سنووری پارێزگای نەینەوا بەتایبەتی قەزای شنگال و دەشتی نەینەوا.

 

جەژنی چلەی هاوین، یەکێکە لە جەژنەکانی کوردانی ئێزدی، جەژنەکە بە رێوڕەسمی جیاواز لە پەرستگای لالش بەڕێوەدەچێت. خەڵکی ئێزدی بۆ بەشداری کردن لەو جەژنەدا، لە ناوخۆ و دەرەوەی وڵات سەردانی باشووری کوردستان دەکەن. ئەو جەژنە بە بۆنەی تێپەڕبوونی وەرزی هاوینەوە دەگێڕدرێت.