ژمارەیەک مامۆستای زانکۆی سەلاحەدین: مانگانە بەناوی سەنتەری رۆشنبیرییەوە 2,500 دینارمان لێ دەبڕدرێت

 

ژمارەیەک مامۆستایەکی زانکۆی سەلاحەدین رۆژی پێنجشەممە بە تۆڕی میدیایی رووداویان گوت: "بەناوی پارە بۆ نۆژەنکردنەوە، نزیکەی دوو ساڵە مانگانە 2500 دینار لە مووچەکەمان دەبڕدرێت".

 

ئەو مامۆستایانە ئاماژە بەوە دەکەن، سەنتەرەکە حکومییە و ئەرکی مامۆستایان نییە بە هیچ پاساوێک پارە بدەن، یان پارەیان لێ ببڕدرێت.

 

د. شاڵاو عەبدولخالق، بەڕێوەبەری سەنتەری رۆشنبیری زانکۆی سەلاحەدین بە تۆڕی میدیایی رووداوی گوت: "نزیکەی دوو ساڵە ئەو پارە وەردەگیرێت، بڕیارەکە لە سەرۆکایەتیی زانکۆ و ئەنجوومەنی زانکۆوە دەرچووە، نەوەک ئێمە".

 

بە گوتەی شاڵاو عەبدولخالق، ئەوان لە بەرامبەر ئەو پارەیەدا خزمەتگوزاری پێشکێشی مامۆستایان و فەرمانبەران دەکەن، "بۆ نموونە چەند خولێکمان کردووەتەوە، خولی مۆسیقا و وێنەکێشان، ئەو خولانە لە دەرەوە لانیکەم 150 هەزار دینارە، ئێمە بۆ منداڵانی مامۆستایان و فەرمانبەرانی زانکۆ 12 هەزار و 500 دینار وەردەگرین".

 

بەڕێوەبەری سەنتەرەکە ئاماژەی بەوەشکرد، بەشێکی پارەکە بۆ خەرجی و نۆژەنکردنەوەی سەنتەرەکە بۆ خزمەتی مامۆستایانی زانکۆکە خەرج دەکرێت.

 

هەر ئەمڕۆ بەرپرسێک لە زانکۆی سەلاحەدین بە تۆڕی میدیایی رووداوی گوت: "پارەدان بۆ ئەندامانی سەنتەرەکەیە و بە زۆریش لە مامۆستایان وەرناگیرێت، بەڵکو ئەندامانی سەنتەرەکە دەبێت پارەکە بدەن".

 

مامۆستایەکی زانکۆی سەلاحەدین ئەوەی رەتکردەوە و گوتی: "نە ئەندامی سەنتەرم و نە منداڵیشم بردووەتە خولەکانی سەنتەر و مانگانەش پارەم لێبڕدراوە".

 

وەزارەتی خوێندنی باڵا ئاگاداری وەرگرتنی پارە نییە. بەرپرسێکی باڵا لە وەزارەتەکە ئەمڕۆ بە رووداوی گوت: "ئێمە ئاگادار نین، بەڵام لە زۆر بڕیاردا زانکۆکان سەربەخۆیی خۆیان هەیە، هەر مامۆستایەکیش ناڕەزایی و هەیە هەستدەکات بە زۆر پارەی لێوەردەگیرێت و بڕەکەی پێ زۆرە، دەتوانێت لە کارگێڕی و ئابووریی زانکۆکەکە سکاڵا تۆمار بکات".

 

زانکۆی سەلاحەدین لە 16 کۆلێژ و 86 بەشی ئەکادیمی پێکدێت، ژمارەی خوێندکارانی نزیکەی 25 هەزار خوێندکارە و نزیکەی دوو هەزار قوتابی خوێندنی باڵاشی هەیە.