حەماس داوای قۆناخی دووەمی ئاگربەست دەکات

 

 

رۆژی یەکشەممە، دوی ئاداری 2025، مەحموود مەرداوی، سەرکردەی حەماس رایگەیاند، "تەنیا رێگە بۆ سەقامگیری ناوچەکە و گەڕاندنەوەی زیندانییەکان، تەواوکردنی جێبەجێکردنی ئاگربەستە، کە بە جێبەجێکردنی قۆناخی دووەمی ئاگربەست دەستپێدەکات."

 

دوێنێ، قۆناخی یەکەمی ئاگربەستی جەنگی غەززە کۆتاییهات و تاوەکو ئێستا گرووپە فەلەستینیەکە، ئیسرائیل و وڵاتانی نێوەندگیر سەرکەوتوو نەبوون لە رێککەوتن لەبارەی قۆناخەکانی دیکەی ئاگربەست. رۆژی 19ـی کانوونی دووەمی ئەم ساڵ، قۆناخی یەکەمی ئاگربەستی غەززە چووە بواری جێبەجێکردنەوە، ئەمە دوای ئەوەی 15 مانگ بوو ئیسرائیل و حەماس لە جەنگ دابوون. 

 

ئیسرائیل شاندێکی بۆ گفتوگۆ ناردووەتە قاهیرە، بەرپرسانی میسریش، وەکو وڵاتێکی نێوەندگیر دەڵێن، بە هاوبەشی لەگەڵ قەتەر و ئەمریکا لە گفتوگۆی چڕدان لەگەڵ هەردوولا بۆ ئەوەی رێککەون لەسەر قۆناخی دووەم. 

 

تاوەکو ئێستا هیچ ئاماژەیەکی رێککەوتن نییە. دوێنێ، حازم قاسم، گوتەبێژی حەماس رایگەیاند، داوایەکی "داگیرکەریان [ئیسرائیل]" بۆ درێژکردنەوەی قۆناخی یەکەمی ئاگربەست رەتکردووەتەوە و داوای رێککەوتنی کۆتایی و جێبەجێکردنی قۆناخی دووەم دەکەن. بۆ ئەو قۆناخە بڕیارە رێککەوتن لەبارەی ئازادکردنی تەواوی بارمتە ئیسرائیلیەکان، کشانەوەی تەواوەتی ئیسرائیل لە غەززە و ئازادکردنی ژمارەیەک زیندانی فەلەستینی بکرێت. 

 

ئەنتۆنیۆ گوتێرێز، سکرتێری گشتیی نەتەوە یەکگرتووەکان هۆشداری لە رێکنەکەوتنی حەماس و ئیسرائیل داوە و رایگەیاند، سەرهەڵدانەوەی جەنگ بۆ غەززە "وێرانکەر" دەبێت. دەشڵێت، "ئاگربەستی بەردەوام و ئازادکردنی هەموو بارمتەکان گرنگە بۆ رێگریی لە زیادبوونی گرژییەکان". 

 

رۆژی 7ـی تشرینی یەکەمی 2023، جەنگی حەماس و ئیسرائیل بە هێرشی گرووپە فەلەستینییەکە بۆ سەر ئەو وڵاتە دەستیپێکرد. دواتر ئیسرائیل دەستی بە هێرشکردنە سەر کەرتی غەززە کرد.