ئاژانسێکی هەواڵیی ئێران وێنەی بنکە سەربازییەکانی ئەمریکا بڵاودەکاتەوە

رۆژی چوارشەممە، 4ـی شوباتی 2026، ئاژانسی هەواڵی فارسی نزیک لە سوپای پاسداران، بۆ دووەم رۆژ لەسەریەک و بەبێ هیچ لێدوانێک، وێنەی ئاسمانیی ئەو بنکە سەربازییانەی بڵاوکردەوە کە هێزەکانی ئەمریکایان تێدایە.

 

وێنەی یەکەم بنکەی ئاسمانیی زەفرەیە لە ئیمارات کە هێزەکانی ئەمریکا و فەرەنسا بەکاری دەهێنن؛ وێنەی دووەمیش بنکەی ئاسمانیی عیسایە لە بەحرێن.

 

بڵاوکردنەوەی ئەم وێنانە لە کاتێکدایە، دۆناڵد ترەمپ هەڕەشەی هێرشی سەربازی لە ئێران کردووە، ئەگەر تاران نەگەڕێتەوە سەر مێزی گفتوگۆ بۆ رێککەوتنێکی نوێی ئەتۆمی. لە بەرامبەردا بەرپرسانی ئێران چەندین جار هەڕەشەی ئەوەیان کردووە کە لە ئەگەری هەر هێرشێکدا، بنکە سەربازییەکانی ئەمریکا لە کەنداو دەکەنە ئامانج.

 

ئیمانوێل ماکرۆن، سەرۆککۆماری فەرەنسا رۆژی سێشەممە رایگەیاند، پاریس بە وردی چاودێریی دۆخەکە دەکات. ماکرۆن گوتی: "ئێمە هەموو رێوشوێنێکی پێویستمان گرتووەتەبەر بۆ ئەوەی دڵنیابین سەربازەکانمان لە دۆخێکی ئەمنیی گونجاودان."

 

گرژییەکان تەنیا لە میدیاکاندا نەماونەتەوە. رۆژی سێشەممە فڕۆکەیەکی جەنگیی ئەمریکا درۆنێکی ئێرانی لە نزیک کەشتیی فڕۆکەهەڵگری ئەبراهام لینکن خستە خوارەوە، کە مانگی رابردوو رەوانەی ناوچەکە کرا.