نەتەنیاهوو: تەرمی دوو بارمتەی دیکەمان گەڕاندەوە

 

 

ئەمڕۆ پێنجشەممە، بنیامین نەتەنیاهوو، سەرۆکوەزیرانی ئیسرائیل رایگەیاند، لە ئۆپەراسیۆنێکی تایبەتی هێزەکانی ئیسرائیل لە کەرتی غەززە، تەرمی دووان لە بارمتەکان، کە لەلایەن حەماسەوە کوژرابوون و بردرابوون بۆ کەرتی غەززە، گەڕێندرانەوە بۆ ئیسرائیل، دوو بارمتەکەش بە ناوەکانی (جودی واینشتاین هەگای و گاد هەگای) کە لە کۆمەڵگە جوونشینەکانی باشووری ئیسرائیل دەژیان.

 

نەتەنیاهوو دەڵێت، "جودی و گاد لە 7ی تشرینی یەکەم کوژران و رفێنران بۆ کەرتی غەززە." 

 

هەر لەبارەی ئەو ئۆپەراسیۆنە، بەگوێرەی راگەیێندراوێکی هاوبەشی سوپا و دەزگای ئاسایشی ئیسرائیل ناسراو بە "شین بێت"، تەرمەکان لە ئۆپەراسیۆنێک لە شاری خان یونس لە باشووری کەرتی غەززە دۆزراونەتەوە و ئاشکراشیان کردووە "ئۆپەراسیۆنەکە بە هاوئاهەنگی لەگەڵ بەڕێوەبەرایەتیی هەواڵگری و هێزە تایبەتەکانی ئیسرائیلدا کراوە." 

 

گاد لە کاتی هێرشەکەی حەماسدا تەمەنی 72 ساڵان بووە و جودی واینشتاین هەگایش تەمەنی 70 ساڵان بووە.

 

ئیسرائیل لەم دواییانەدا هێرشەکانی بۆ سەر غەززە چڕکردووەتەوە، ئەمەش هەروەکو خۆیان دەڵێن هەوڵێکە بۆ لەنێوبردنی حەماس و گەڕاندنەوەی سەرجەم بارمتەکان بە زیندوویی و هەروەها بەوانەشی گیانیان لەدەستداوە و تەرمەکانیان لای حەماسن. 

 

لەکۆی 251 بارمتە، کە لە کاتی هێرشەکەی حەماسدا گیران و لەگەڵ خۆیان بردیانن بۆ نێو غەززە، هێشتا 55 لەو کەرتە ماون، کە 34یان گیان لەدەستدانیان لەلایەن سوپای ئیسرائیلەوە پشتڕاست کراوەتەوە.